सचिन कदम, साम प्रतिनिधी

अलिबागमध्ये एक दुखद घटना घडलीय. येथील समुद्रात दोन तरूण बुडाले आहेत. पोलीस यंत्रणा आणि जीवरक्षक तासाभरापासून दोघांचा शोध घेत आहेत. ड्रोन आणि बॅटरीच्या मदतीनं तरुणांचा शोध घेतला जात आहे. शशांक सिंग आणि पलाश पखर अशी बेपत्ता तरुणांची नावे आहेत. उरण नवी मुंबई परिसरातून मित्र फिरायाले आले होते, अशी माहिती अलिबाग तहसीलदार विक्रम पाटील यांनी दिलीय.

अलिबाग येथील समुद्रात बुडून दोन पर्यटक तरुण बेपत्ता झाल्याची घटना आज संध्याकाळी ६.३० वाजण्याच्या सुमारास घडली आहे. ड्रोन आणि बॅटरीच्या सहाय्याने पोलिस आणि जीवरक्षक या दोघांचा शोध घेत आहेत. शशांक सिंग (१९) रा. उलवे ता. उरण आणि पलाश पखर (१९) रा. सानपाडा नवीमुंबई अशी बुडून बेपत्ता झालेल्या तरुणांची नावे आहेत. उरण नवी मुंबई परिसरातील चार मित्र अलिबागला फिरायला आले होते. संध्याकाळच्या सुमारास यातील एकजण पोहायला उतरला.

तो बुडू लागल्याने दुसरा त्याला वाचवायला गेला. मात्र दोघेही बुडून बेपत्ता झाल्याची माहिती अलिबागचे पोलिस निरीक्षक किशोर साळे यांनी दिली. घटनेची माहिती मिळताच अलिबाग पोलिसांनी घटनास्थळी धाव घेतली. तात्काळ जीवरक्षकाना पाचारण करण्यात आले. रात्रीच्या अंधारात ड्रोन आणि बॅटरीच्या मदतीने शोध सुरू करण्यात आला आहे.