राजेश भोस्तेकर

रायगड : केंद्रातील भाजप सरकारमुळे देशामध्ये सात वर्षात महागाईने उचांक गाठला आहे. इंधन, खाद्यतेल, गॅस दरवाढ करून सर्वसामान्य जनतेला वेठीस धरले जात आहे. काँग्रेसचे महाराष्ट्र प्रदेश अध्यक्ष नाना पटोले यांच्या आदेशानुसार आणि महिला प्रदेशाध्यक्ष संध्या सव्वालाखे याच्या सूचनेनुसार रायगड जिल्हा महिला काँग्रेसने आज केंद्र इंधन दरवाढीविरोधात अलिबाग जिल्हाधिकारी कार्यालयासमोर निदर्शने करून आंदोलन केले.

यावेळी केंद्र सरकार आणि पंतप्रधान नरेंद्र मोदी यांच्या विरोधात जोरदार घोषणाबाजी महिला पदाधिकाऱ्यांनी केली. निवासी उपजिल्हाधिकारी पद्मश्री बैनाडे यांना महिला शिष्टमंडळाने आपल्या मागण्याचे निवेदन दिले. Raigad District Women's Congress is aggressive against the Central Government

हे देखील पहा -

पेट्रोल शंभरी तर डिझेल नव्वदी पार झाले आहे. आंतरराष्ट्रीय बाजारात कच्या तेलाचे दर नीचांकी असताना देशात इंधन दर दिवसेंदिवस वाढत आहेत. डिझेल वर 18 रुपये रस्ते विकास सेस व 4 रुपये कृषी सेस घेतला जात आहे. घरगुती गॅस सिलेंडरचे दरही हजार रुपयांपर्यत पोहचत आहे.खाद्यतेलाचे भावही 200 रुपये लिटरवर पोहचले आहेत.डाळीचे भावही प्रचंड वाढले आहेत. केंद्र सरकारच्या या नियोजनशून्य कारभारामुळे महागाईचा फटका हा सर्वसामान्यांना बसला आहे.

इंधन, खाद्यतेल, गॅस दरवाढ कमी करण्याबाबत भाजप सरकार कोणतीही पावले उचलताना दिसत नाही. याविरोधात आज जिल्हा महिला काँग्रेसतर्फे जिल्हाधिकारी कार्यालयासमोर निदर्शने करून आंदोलन केले. महाराष्ट्र प्रदेश काँग्रेस उपाध्यक्षा, कोकण प्रभारी सुदर्शना कौशिक, जिल्हा महिला काँग्रेस अध्यक्षा ऍड श्रद्धा ठाकूर, अलिबाग महिला अध्यक्षा सुजाता पाटील, माथेरान वर्षा शिंदे, मोनिका पाटील, दीपाली म्हात्रे, विदुला खेडेकर आदी महिला पदाधिकारी आंदोलनात सहभागी झाल्या होत्या.

Edited By : Krushnarav Sathe