Pandharpur Corridor : पंढरपूर शहरातील नागरिकांनी सु़धारीत तीर्थक्षेत्र विकास आराखड्याबाबत पंधरा दिवसात सादर करण्याच्या सूचना कराव्यात. त्यानंतरच पुढील निर्णय घेतला जाईल असे आश्वासन पालकमंत्री राधाकृष्ण विखे पाटील (radhakrishna vikhe patil) यांनी दिले आहे.

पंढरपूर तीर्थक्षेत्र विकास आराखड्याबाबत पालकमंत्री राधाकृष्ण विखे पाटील यांच्यासमवेत गुरुवारी रात्री पंढरपुरातील व्यापारी आणि नागरिकांची बैठक झाली. या बैठकीमध्ये पालकमंत्री विखे-पाटील यांनी दिलासादायक माहिती दिली.

पंढरपूर विकास आराखडा आणि कॉरिडॉर हा वारक-यांना केंद्रबिंदू मानून बनविण्यात आला असला तरी स्थानिक नागरिकांना उध्वस्त करून राबविला जाणार नसल्याची ग्वाही विखे पाटील यांनी यावेळी दिली. दरम्यान नागरिकांनी आपला आराखडा येत्या १५ दिवसात देण्याचे आवाहन त्यांनी केले.

हा कॉरिडॉर अथवा शहरातील विकास आराखडा हा भविष्याचा विचार करून केला जाणार असल्याचे सांगताना यात विस्थापित हाेणा-यांना चांगले पॅकेज देण्याचाही प्रयत्न असल्याचे विखे पाटलांनी नमूद केले.

वाराणसी व उज्जैन या ठिकाणी झालेल्या कॉरिडॉरला तेथील व्यापारी अथवा नागरिकांनी (citizens) विरोध केल्याचे समोर आले नसून त्याच धर्तीवर येथील व्यापारी आणि नागरिकांना चांगला मोबदला देत त्यांना विश्वासात घेऊन आराखडा राबविण्याचा शासनाचा विचार असल्याचे त्यांनी नमूद केले. ज्यावेळी तो टप्पा येईल त्यावेळी विस्थापित होणारे व्यापारी आणि नागरिकांचे एक बोर्ड बनवून पुढील चर्चा होईल असे संकेत विखे पाटलांनी दिले. (Maharashtra News)

Edited By : Siddharth Latkar