पुणे : पुणे-सोलापूर महामार्गावर इंदापूर तालुक्यातील काळेवाडी नंबर १ येथे ह्युंडाई कंपनीच्या कारला पाठीमागून धडक दिल्याने पिकअप आणि ह्युंडाई कारचा अपघात झाला आहे. यात १० ते १२ लोकं जखमी झाल्याची प्राथमिक माहिती मिळत असून हे सर्व लोक दौंड तालुक्यातील कानगाव मधील असल्याची माहिती स्थानिकांकडून मिळत आहे.

इंदापूर तालुक्यातील लोणी देवकर येथील वेताळ बाबाच्या यात्रेसाठी हे लोकं लाईट डेकोरेशनच्या कामाकरता निघाले होते. अशी माहिती स्थानिकांकडून मिळत असून सायंकाळी पाच वाजताच्या सुमारास पुणे-सोलापूर महामार्गावर काळेवाडी नंबर एक नजीक हा अपघात झाला आहे.

या अपघातामध्ये पिकअप गाडी रस्ता दुभाजक तोडून बाजूला फरफटत गेली. यावेळी पिकअप मधील सुमारे १० ते १२ लोकं रस्त्यावर जखमी होऊन पडले. यातील ४ ते ५ लोकं गंभीर जखमी असल्याची माहिती मिळत आहे. अपघात समजताच स्थानिकांनी आणि महामार्ग पोलिसांनी तात्काळ बचावकार्य करत चार रुग्णवाहिका मागवून जखमींना उपचारासाठी रुग्णालयात पाठवल्याची माहिती मिळत आहे.