पुणे : पुण्यातून एक हृदयद्रावक घटना समोर आली आहे. स्विमींग पूलमध्ये पडून एका चिमुकल्याचा मृत्यू झाल्याची दुर्दैवी घटना घडली आहे. पुण्यातील धायरी भागात पार्क व्हिव सोसायटीमध्ये काळीज पिळवटून टाकणार हा प्रकार घडला आहे. सोसायटीमध्ये मित्रांसोबत खेळताना स्विमिंग पूलमध्ये पडून एका ६ वर्षीय चिमुकल्याचा दुर्दैवी मृत्यू झाला.

निनाद गोसावी (वय ६ वर्ष) असं मृत्यू झालेल्या चिमुकल्याचं नाव आहे. काल मंगळवारी रात्री आठ वाजेच्या सुमारास ही घटना घडली. निनाद सोसायटीच्या आतमध्ये बराच वेळ झाला खेळत होता. मात्र खूप वेळ झाल्यानंतर चिमुकला घरी परतला नसल्यामुळे त्याची शोधाशोध सुरु झाली. त्यानंतर तब्बल दोन तासांनी निनाद स्विमिंग पूलमध्ये मृतावस्थेत आढळल्यानं एकच खळबळ उडाली.

राजगुरुनगरमध्ये हिट अँड रन

राजगुरुनगर भीमाशंकर मार्गावर भीषण अपघात झाला आहे. भीमाशंकर मार्गावर सातकरस्थळ येथे हिट अँड रनचा थरार झाला आहे. एका डॉक्टरने तीन दुचाकींसह पादचाऱ्यांना चिरडलं आहे. भरधाव वेगाने आलेल्या कारने पादचाऱ्यांना चिरडलं आहे. राजगुरुनगरमध्ये काल रात्री ही घटना घडली आहे. या घटनेचे फोटो आणि व्हिडिओ समोर आलेले आहेत.

कारचालक हा नशेत कार चालवत असल्याचा स्थानिकांनी आरोप केला आहे. सर्वात आधी पादचारी नागरिकांना धडक दिल्यानंतर तीन दुचाकींना कारने धडक दिली. ५ जण हे गंभीर जखमी असून त्यांच्यावर खासगी रुग्णालयात उपचार सुरु आहेत. कार अपघातातील चालक तथा दारुच्या नशेत असलेला व्यक्ती हा डॉक्टर असल्याची प्राथमिक माहिती समोर आली आहे.