रोहिदास गाडगे, साम टिव्ही

पुणे : पुण्यात बैलगाडा शर्यतीचं तुफान क्रेझ आहे. दरवर्षी बैलगाडा शर्यती कोणत्या ना कोणत्या घाटात होत असतात. या शर्यंतीमध्ये काही अपघाताही होत असतात. मात्र, आता या बैलगाडा शर्यतींमध्ये एक संतापजनक प्रकार समोर आला आहे. बैलगाडांच्या मालकासाठी तर हा केवळ खेळ आहे, पण यात मुक्क्या प्राण्यांचा जीव जात आहे.

बैलगाडा शर्यतीच्या घाटात बैलाला पळविण्यासाठी चक्क बॅटरी लावून शॉक दिला असल्याचा प्रकार समोर आला आहे. हा प्रकार यात्रा कमिटीने उघड करत बैलाच्या जीवाशी खेळ खेळणाऱ्या बैलगाडा मालकाला शर्यतीच्या घाटातच खडेबोल सुनावत बंदी घालण्याचा इशारा दिलाय. आंबेगाव तालुक्यातील निघोटवाडी येथे जय हनुमान यात्रानिमित्ताने बैलगाडा शर्यतीच्या घाटात हा धक्कादायक प्रकार बघण्यास मिळाला.

बैलाच्या मागच्या बाजूला बॅटरीचा शॉक दिला जात होता. या बैलगाड्यांवर घाटात बंदी घालत आयोजकांनी चांगलेच खडेबोल सुनावत इशारा दिलाय. उत्तर पुणे जिल्ह्यात जत्रा यात्रांचा उत्सव सुरुय. या यात्रांमध्ये बैलगाडा शर्यतीचा थरार रंगतोय अन बक्षिसही जोरदार असल्याने बैलगाडा शर्यत पहिल्या नंबरमध्ये यायला हवा म्हणून बैलगाडा मालकांचा बैलांच्या जीवाशी खेळ सुरु झाला. याविरोधात यात्रा कमिटी आणि बैलगाडा संघटना आक्रमक झालीय.