राजकारणासाठी लोक क्रौर्याची परिसीमा देखील पार करताना दिसत आहेत. अशातच परंपरागत राजकीय वैमनस्यातून वचपा काढण्यासाठी चक्क विरोधकाच्या घराभोवती तारा बांधून त्यात वीज प्रवाह सोडण्यात आल्याचा संतापजनक प्रकार समोर आला आहे. या घटनेमध्ये ३७ वर्षीय महिलेचा विजेच्या धक्क्याने जागीच मृत्यू झाला आहे, तर तिचा पती थोडक्यात बचावला. ही घटना शनिवारी पहाटेच्या सुमारास घडली आहे. सविता मनेश पवार असे मृत महिलेचे नाव आहे.

घटनास्थळी पोहोचलेल्या पोलिसांनी दिलेल्या माहितीनुसार, सविता पवार रात्री अडीचच्या सुमारास बाथरूमसाठी उठल्या. घराबाहेर असलेल्या बाथरूमकडे जाण्यासाठी दरवाजा उघडताच त्यांचा अचानक तोल जाऊन त्या जमिनीवर कोसळल्या. त्याचवेळी त्यांच्या पती मनेश यांच्या हाताला आणि पायाला विजेचा झटका बसल्याने त्यांनी आरडाओरड केली. त्यांचा आवाज ऐकून शेजारी राजू पवार, राजू राठोड आणि इंदल पवार धावून आले आणि दोघांनाही आर्णी येथील ग्रामीण रुग्णालयात दाखल केले. मात्र, डॉक्टरांनी सविता यांना मृत घोषित केले.

या अपघातामागे घातपात असल्याचा संशय व्यक्त करत मनेश पवार यांनी घाटंजी पोलीस ठाण्यात सहा जणांविरुद्ध तक्रार दाखल केली आहे. तक्रारीनुसार, ग्रामपंचायत निवडणुकीतील वैमनस्यातून इंदल राठोड, सुदाम चव्हाण, गणेश राठोड, विनोद चव्हाण, राजू जाधव आणि चेतन चव्हाण या सहा जणांनी त्यांच्या घराच्या बाहेर विजेचा प्रवाह असलेला तार लावला होता. याच तारेला स्पर्श झाल्यामुळे सविता यांचा मृत्यू झाला, असा गंभीर आरोप करण्यात आला आहे.

पोलिसांकडून या घटनेची गांभीर्याने दखल घेण्यात आली आहे. या प्रकरणी कलम ३०२ अंतर्गत गुन्हा नोंदवण्यात आला असून तपास सुरू आहे. यापूर्वीही पवार कुटुंब आणि संशयित आरोपींमध्ये वाद झाले असून त्याबाबतचे गुन्हे आधीच नोंदवले गेले होते, अशी माहितीही तक्रारीत नमूद करण्यात आली आहे.

घटनास्थळी अतिरिक्त पोलिस बंदोबस्त तैनात करण्यात आला असून गावात तणावाची स्थिती पाहता दंगल नियंत्रण पथकही रवाना करण्यात आले आहे. ही संपूर्ण घटना गावात राजकारणाने घेतलेले धोकादायक वळण स्पष्ट करते आणि स्थानिक राजकारणाचा परिणाम किती गंभीर होऊ शकतो, हे अधोरेखित करते. दरम्यान या घटनेचा पोलीस अधिक तपास करत आहेत.