सचिन जाधव, साम टीव्ही प्रतिनिधी

सोलापुरात राष्ट्रवादी अजित पवार गटाला डबल धक्का मिळाल्यानंतर धैर्यशील मोहिते-पाटील यांचे चुलत भाऊ धवल सिंह मोहिते पाटील यांनी अजित पवार यांची पुण्यात भेट घेतली. आज अजित पवार हे पुणे दौऱ्यावर असून निवडणुकीच्या पार्श्वभूमीवर पुण्यातील हालचालींना वेग येणार आहे. धवल सिंह मोहिते पाटील यांच्या भेटीने राजकारणात नव्या चर्चांना उधाण आले आहे.

सोलापूरमधील राष्ट्रवादीचे माजी आमदार राजन पाटील, माजी आमदार यशवंत माने तसेच माजी आमदार बबन शिंदे यांच्या दोन्ही सुपुत्रांनी भाजप प्रवेश केल्याने जिल्ह्यात राष्ट्रवादीला मोठा हादरा बसला. भाजपने 'ऑपरेशन घड्याळ' राबवून माजी आमदारांना गळाला लावून अजित पवार यांना जोरदार दणका दिला.

जिल्ह्यात स्थानिक स्वराज्य संस्था निवडणुकीच्या तोंडावर अजित पवार गटाचे काही आमदार बॅकफूटला गेल्याचे चित्र निर्माण झाले असताना, अकलूजचे धवलसिंह मोहिते पाटील यांनी अजित पवार यांची भेट घेतली. त्यांच्या या भेटीनंतर राष्ट्रवादी प्रवेशाच्या चर्चा सुरू झाल्या आहेत.

धवलसिंह मोहिते पाटील हे महाराष्ट्राचे माजी उपमुख्यमंत्री विजयसिंह मोहिते पाटील यांचे पुतणे आणि आमदार रणजितसिंह मोहिते पाटील यांचे चुलत भाऊ आहेत. धवलसिंह मोहिते पाटील हे काँग्रेसचे सोलापूर जिल्हाध्यक्ष होते. विधानसभा निवडणुकीवेळी त्यांनी पक्षाचा तडकाफडकी राजीनामा दिला होता. मध्यंतरी काहीसे शांत झालेले धवलसिंह मोहिते पाटील यांनी निवडणुकीच्या तोंडावर अजित पवार यांची भेट घेतल्याने भविष्यकाळातली राजकीय संधी पाहून ते आपल्या मनगटावर घड्याळ बांधणार का? अशी चर्चा सुरू झाली आहे.