अमरावतीतून धक्कादायक घटना समोर आली आहे. अमरावती गुन्हेशाखेने स्पा सेंटरवर धाड टाकत मोठी कारवाई केली आहे. कॅम्प मार्गावरील नेक्स्ट लेवल मॉलमध्ये असलेल्या स्पा सेंटरमध्ये मसाजच्या नावाखाली देहविक्रीचा व्यवसाय सुरु होता. या घटनेची माहिती मिळताच पोलिसांनी छापा टाकला आहे. याप्रकरणी स्पा सेंटरच्या मालकाला अटक करण्यात आली आहे.

काही दिवसांपूर्वी पिंपरी येथून बावधन पोलिसांनी दिव्य शक्तीची आत्मभूती असल्याचे सांगत अडचणीतून बाहेर काढण्यासाठी अश्लील वर्तन करून खाजगी चित्रीकरण करणाऱ्या प्रसाद तामदार या भोंदू बाबाला अटक केली. त्यानंतर आता अमरावतीत स्पा सेंटरच्या नावाखाली नको त्या गोष्टी घडताना पोलिसांना आढळल्या. अमरावती शहराच्या गाडगेनगर पोलीस स्टेशनच्या क्षेत्रात येणाऱ्या कॅम्प मार्गावरील नेक्स्ट लेवल मॉलमध्ये पहिल्या मजल्यावर स्पा ९९ नावाचे मसाज सेंटर आहे. या सेंटरमध्ये गेल्या काही दिवसांपासून मसाज थेरेपीच्या नावावर चक्क देहविक्रीचा व्यवसाय सुरू होता.

या व्यवसायाचा पोलिसांनी छापा टाकत भांड फोडलं आहे. गुन्हे शाखेच्या युनिट दोन ने स्पा ९९ या सेंटरवर धाड टाकत हा संपूर्ण प्रकार उघडकीस आणला आहे. दरम्यान पोलिसांनी घटनास्थळावरून आक्षेपार्ह वस्तू,मोबाईल,रोख असा एकूण १ लाख १४ हजार ७०० रुपयांचा मुद्देमाल जप्त केला आहे. तिघांविरुद्ध गाडगेनगर पोलिसात गुन्हा दाखल करण्यात आला आहे. पोलिसांनी केलेल्या या कारवाईमुळे अमरावतीत सुरू असलेल्या अवैध व्यवसायाचा प्रश्न पुन्हा एकदा ऐरणीवर आला आहे.

मसाज सेंटरच्या नावाखाली आजकाल बऱ्याच चुकीच्या घटना घडत आहेत. ग्राहकांना सेवा देण्याच्या बहाण्याने भलत्याच गोष्टी पुरवल्या जातात. या प्रकरणात ग्रहकांची फसवणूक केली जाते. या फसवणुकीत महिला आणि तरुणींची संख्या जास्त आहे. दरम्यान अशाप्रकारच्या छुप्या धंद्यांची माहिती पोलिसांना कळवून सुसंस्कृत आणि सुरक्षित समाजाच्या निर्मितीसाठी हातभार लावावा असे प्रशासनातर्फे आवाहन केले आहे.