Nashik News : नवसारीहून बहिणीकडे आलेल्या एका विवाहितेवर चेहडी परिसरात सामूहिक अत्याचार करण्यात आला. या घटनेतील दोन संशयितांना पाेलिसांनी अटक केली आहे. त्यांच्याविरुद्ध गुन्हा दाखल करण्यात आला आहे. संशयितांपैकी एक रेल्वे स्थानकावर पाणी विक्री करताे तर दुसरा रिक्षाचालक आहे अशी माहिती पाेलिसांनी दिली. (Maharashtra News)

नाशिकरोड पोलिसांनी दिलेल्या माहितीनुसार, पीडित १९ वर्षीय विवाहिता तिच्या बहिणीला भेटण्यासाठी रेल्वेने नवसारीहून मुंबईमार्गे नाशिकला आली. बुधवारी मध्यरात्रीनंतर पहाटे अडीचच्या सुमारास ती नाशिकरोड रेल्वे स्थानकावर उतरली. त्यानंतर सहप्रवाशाच्या मोबाईलवरून तिने बहिणीला फोन केला. पण उशीर झाला असल्याने आता येण्याची घाई करू नका, रेल्वे स्टेशनवरच थांबा असे बहिणीने तिला सांगितले.

मी सकाळी तुला घ्यायला येईन असे बहिणीने सांगितल्याने पीडितेने रेल्वे स्थानकावर थांबण्याचा निर्णय घेतला. दरम्यान, रेल्वे स्थानकावर पाणी विकणाऱ्या कुणाल पवार याने तिला मदत करण्याच्या बहाण्याने विचारणा केली. तसेच काही खायला दिले. काही वेळाने त्याने प्रकाश मुंडे या रिक्षाचालक मित्रालाही बोलावून घेतले.

पीडितेची दिशाभूल करून दोघांनी तिला चेहाडी येथील शिव परिसरात नेले. तेथे पेरूच्या बागेत नेऊन तिच्यावर सामूहिक अत्याचार केला. त्यानंतर त्याने पीडितेला बेदम मारहाण केली आणि कोणाला सांगितल्यास जीवे मारण्याची धमकी दिली. दरम्यान, पीडितेने आरडाओरडा करून तेथून पळ काढला. त्यावेळी शेजारील इमारतीतील सुरक्षा रक्षकाच्या मदतीने तिने पोलिसांपर्यंत (police) घटनेची माहिती पाेहचवली.

पाेलिसांनी पीडितेच्या तक्रारीनंतर कुणाल पवार आणि प्रकाश मुंडे यांची चाैकशी करत त्यांना ताब्यात घेतले. त्यांच्यावर गुन्हा दाखल करुन त्यांना अटक केली. या घटनेमुळे नाशिक शहर परिसरात खळबळ माजली.

Edited By : Siddharth Latkar