- तबरेज शेख

Yogesh Mogre News : गाडी चोरण्याच्या उद्देशाने नाशिकच्या इंदिरानगर पोलीस ठाणे हद्दीतील कंपनीत CEO पदावर असलेल्या योगेश मोगरे (yogesh mogre nashik) यांचा खून केल्याचे पोलीस तपासात समोर आले आहे. घटनेतील एका अल्पवयीन संशयित आरोपीला पोलिसांनी ताब्यात घेतल्याची माहिती नाशिक पाेलीस उपायुक्त प्रशांत बच्छाव यांनी दिली. (Maharashtra News)

या घटनेबाबत पाेलिसांनी दिलेल्या माहितीनूसार अंबड MIDC मधील रोहिणी इंडस्ट्रीजचे CEO योगेश मोगरे हे पांडवलेणी परिसारत सर्व्हिस रोड येथे असलेल्या आंगण हॉटेलच्या बाहेर टपरीवर उभे असताना दोघांनी मोगरे यांच्याकडे असलेली गाडी चोरण्याच्या उद्देशाने चावी घेण्याचा प्रयत्न केला.

मात्र मोगरे यांनी त्यास विराेध दर्शविला. त्यामुळे संशयितांचा राग अनावर झाला. त्यांनी त्यांच्याजवळ असलेल्या चाकूने माेगरे यांच्यावर वार केले. त्यांनतर दोघे संशयित हे मोगरे यांची कार घेऊन पसार झाले.

या घटनेनंतर इंदिरानगर पोलीस ठाण्यात अज्ञातांवर गुन्हा दाखल करण्यात आला होता. या घटनेचा तपास गुन्हे शाखा 2 कडे देण्यात आला होता. त्यांनतर गुन्हे शाखेचे एकूण 6 पथके संशयितांच्या शोध घेण्यासाठी रवाना झाली होती.

साक्षीदार,CCTV आणि काही भौतिक पुराव्यांच्या आधारे गुन्हे शोध पथकाने हरियाणा येथून एका अल्पवयीन संशयिताला ताब्यात घेतले. त्याच्याकडे चौकशी केली असता अल्पवयीन संशयित आणि त्याचा आणखी एक साथीदार हे हरियाणा येथून मुंबई येथे काेणाला तरी जबरदस्तीने पळवून नेण्याच्या उद्देशाने आले हाेते.

त्यासाठी संशयितांना कारची गरज हाेती. त्यामुळे माेगरे यांच्यावर हल्ला केल्याचे पाेलीस तपासात निष्पन्न झाल्याची माहिती प्रशांत बच्छाव (पोलीस उपआयुक्त, नाशिक) यांनी दिली. दरम्यान या घटनेतील एकास अटक केली आहे दुसरा संशयित आरोपी अजितसिंग सत्यवान लठवाल याचा पोलीस शोध घेताहेत.

Edited By : Siddharth Latkar