विधानसभा निवडणूक 2019 मध्ये लॉबी करून तिकिटासाठी पंकजा मुंडे यांना ब्लॅकमेल करण्यात आलं. परळीतील परळीतील पराभवांची भीती दाखवली, असं वक्तव्य भाजपचे ज्येष्ठ नेते मोहन जगताप यांनी केलं आहे. त्यांच्या या वक्तव्याने एकच खळबळ उडाली आहे. तसेच त्यांनी पक्ष सोडण्याचेही संकेत दिले आहेत.

येत्या विधानसभा निवडणुकीच्या मैदानात उतरण्याचा माझा निर्धार झालाय. पक्ष, झेंडा कोणता हे तुम्हाला येत्या पाच तारखेला सांगतो, अशी रोखठोक भूमिका मोहन जगताप यांनी जाहीर करत बंडाचा झेंडा हाती घेतला आहे. बीडच्या माजलगावमध्ये आयोजित कार्यकर्ता मेळाव्यात ते बोलत होते.

यावेळी बोलताना मोहन जगताप म्हणाले की, आमच्या पक्षाला दुर्भाग्य सुचलं चांगलं सुरु असताना अजित दादाला घेतलं. त्यामुळे निष्ठावान लोकांची अडचण झाली. 2019 च्या विधानसभा निवडणुकीत भाजप नेत्या पंकजा मुंडे यांना ब्लॅकमेल करून माजलगाव मतदारसंघात दुसऱ्यांनीच उमेदवारी मिळवली. परंतु त्याचा काही उपयोग झाला नाही. पंकजा मुंडे यांचा तर पराभव झालाच परंतु माजलगावमधून भाजपा कडून जे उभे होते, त्यांचाही पराभव झाला. आता मात्र यावेळी मी माघार घेणार नाही. निवडणूक लढवणारच असल्याचे देखील मोहन जगताप यांनी म्हटले.

यावेळी त्यांनी महायुतीचा घटक पक्ष असलेल्या अजित पवार राष्ट्रवादी काँग्रेसच्या आमदार प्रकाश सोळंके यांच्यावरही टीकास्त्र सोडले. आमदार हे बाहेरचे गुत्तेदार आणून टक्केवारी घेत आहेत. स्थानिकांना काम देत नाहीत, विकास कामात माजलगाव मतदारसंघ मागे पडलाय. माझ्यावर वैयक्तिक टीका करत आहेत. परंतु मी जर त्यांच्या वैयक्तिक टीका करायला लागलो, तर त्यांना रस्त्यावर चालले मुश्किल होईल, असे देखील मोहन जगताप यांनी म्हटले आहे.