Water Supply News:

तीर्थक्षेत्र असलेल्या पंढरी नगरीवर उन्हाळ्यापूर्वीच जल संकट ओढावले आहे. शहराला पाणीपुरवठा करणाऱ्या बंधाऱ्यातील पाणी पातळी कमी झाल्याने आजपासून (२९ जानेवारी) शहराला एक दिवस आड पाणी पुरवठा सुरू करण्यात आला आहे.

वाढती पाणी टंचाई लक्षात घेवून नगरपालिकेने हा निर्णय घेतला आहे. उजनी धरणातील पाणी पातळी मायन्स गेली आहे. त्यामुळे धरणातून भीमानदी पात्रात पाणी सोडले जाण्याची शक्यता कमी आहे. या पार्श्वभूमीवर पालिकेने आतापासूनच एक दिवस आड पाणी पुरवठा करण्यास सुरूवात केली आहे.

सध्या येथील बंधाऱ्यात आणखी दोन महिने पुरेल इतकाच पाणीसाठा आहे. नागरिकांनी पाणी काटकसरीने वापरावे असे आवाहन पाणीपुरवठा समितीचे माजी सभापती विक्रम शिसरसट यांनी केले आहे.

यंदा राज्यात अनेक ठिकाणी हवातसा पाऊस बरसलेला नाही. त्यामुळे नागरिकांना मोठ्या पाणीटंचाईचा सामना करावा लागतो आहे. काही ठिकाणी हिवाळ्याच्या दिवसांतही विहिरी कोरड्या पडल्यात.

पाणीपुरवठा योजनेसाठी खोदले रस्ते, काम संथ गतीने होत असल्याने गावकरी त्रस्त

वाशीमच्या मंगरुळपिर तालुक्यातील वनोजा इथं जल जीवन मिशन अंतर्गत नळ योजनेचं काम सुरू आहे. मात्र हे काम अतिशय संथ गतीनं होत असून, गावात पाईप लाईन करण्यासाठी मुख्य रस्त्यावर अनेक ठिकाणी खोदून खड्डे करण्यात आले आहेत. काम पूर्ण होत नसल्याने पाण्यासह नागरिकांना खराब रस्त्यांचा देखील सामना करावा लागतोय.