पंढरपूर : पंढरपूरात आषाढी यात्रेची जोरदार तयारी सुरु आहे. भाविक देखील पंढरपुरात जाऊन विठूरायाचे दर्शन घेत आहेत. दरम्यान पुढील काही दिवसात भाविकांची संख्या वाढणार आहे. या दृष्टीने प्रशासन व मंदिर समितीची तयारी सुरु आहे. दरम्यान आषाढी यात्रेच्या निमित्ताने विठ्ठल मंदिर समितीने यंदा अकरा लाख लाडू प्रसाद बनवण्याचे उद्दिष्ट ठेवले असून यंदा या लाडू प्रसादात सुका मेव्याचा देखील वापर करण्यात येणार आहे. 

आषाढी यात्रेसाठी विठ्ठल मंदिर समितीची तयारी सुरु आहे. अवघ्या पंधरा दिवसांवर आषाढी एकादशी (Ashadhi ekadashi) असल्याने भाविकांची आतापासूनच रीघ लागली आहे. दर्शन बारीमध्ये आतापासूनच भाविकांच्या रांगा लागलेल्या असून भाविकांची हि संख्या रोज वाढत आहे. तर विठ्ठल दर्शनासाठी येणाऱ्या भाविकांना लाडूचा प्रसाद दिला जात असतो. त्या अनुषंगाने यंदा ११ लाख लाडू बनविण्याचे उद्दिष्ट आहे. त्यानुसार (Pandharpur) आत्तापर्यंत २ लाख लाडू तयार करण्यात आले आहेत. लाडू तयार करण्यासाठी सध्या १०० कर्मचारी काम करत आहेत.

लाडूसाठी असे वापरली साहित्य 

वारीसाठी लाडू प्रसाद तयार करण्याचे काम वेगाने सुरू आहे. लाडू तयार करण्यासाठी २०० क्विंटल हरभरा दाळ, ३०० क्विंटल साखर आणि १५ हजार किलो तेलाचा वापर केला जाणार आहे. तर विठ्ठलाच्या लाडू प्रसादामध्ये यंदा प्रथमच सुका मेव्याचा वापर करण्यात येत असून यात ४०० किलो बेदाणा, ३०० किलो काजू आणि २० किलो विलाईची यांचा वापर करण्यात आला आहे. सुक्या मेव्याचा वापर करून तयार करण्यात आलेल्या पौष्टिक लाडू प्रसादाला भाविकांकडून यंदा मोठी मागणी वाढली आहे.