पालघर : काका, काका असं प्रेमाने बोलणारा हा कावळा...सध्या या कावळ्याने सोशल मीडियावर चांगलाच भाव खाल्लाय. अगदी माणसाप्रमाणेच हा कावळा काका म्हणून हाक मारतोय. या कावळ्याला माणसांची एवढी गोडी लागलीय की तो लहान मुलांसारखं बोबड्या आवाजात हाक मारतो. यामुळेच या कावळ्याचे सगळेच लाड करतात. अंगा खांद्यावर या कावळ्याला सगळेच खेळवतात.

पालघर जिल्ह्यातल्या वाडा तालुक्यातील गारगाव इथे राहणाऱ्या मंगळ्या मुखणे यांनी हा कावळा पाळलाय. तीन वर्षापूर्वी त्यांच्या मुलांनी पिल्लू असताना या कावळ्याला आणलं. कुटुंबातील सदस्याप्रमाणेच या कावळ्याला सगळ्यांनी लळा लावला. त्याला वेळेत खाणं-पाणी अशा सगळ्या सुविधा कावळ्याला दिल्या. मुलं जशी बोलतात तसाच हा कावळाही बोलू लागला. आता या कावळ्याच्या सगळेच प्रेमात पडलेत. त्याला पाहण्यासाठी लांबून लांबून लोक येऊ लागलीय. याआधी तुम्ही आण्णा आण्णा बोलणारा कोंबडाही पाहिला होता. मात्र, आता या कावळ्याने काका काका बोलून सगळ्यांनाच आपलंस केलंय.