रुपेश पाटील, साम प्रतिनिधी

महाराष्ट्र नवनिर्माण सेनेतील अंतर्गत गटबाजी आता उघडपणे समोर आली आहे. पालघर येथील मनसे कार्यालयात आयोजित करण्यात आलेल्या नियोजित बैठकीदरम्यान दोन गट आमनेसामने आल्याने जोरदार हाणामारी झाल्याची घटना घडली. या घटनेत मनसेचे माजी शहराध्यक्ष सुनील राऊत गंभीर जखमी झाले असून त्यांच्यावर पालघरमधील रुग्णालयात उपचार सुरू आहेत.

मिळालेल्या माहितीनुसार, बैठकीदरम्यान काही मुद्द्यांवरून वादाला सुरुवात झाली. हा वाद काही वेळातच विकोपाला गेला आणि दोन्ही गटांमध्ये धक्काबुक्की तसेच मारहाण झाली. या हाणामारीत सुनील राऊत यांना गंभीर दुखापत झाली.मारहाणीनंतर सुनील राऊत यांनी मनसेचे जिल्हाप्रमुख समीर मोरे यांनी आपल्यावर मारहाण केल्याचा आरोप केला आहे. तसेच या घटनेत मनसेचे तालुकाध्यक्ष संदीप किणी यांनाही मारहाण झाल्याची माहिती समोर आली आहे. या घटनेमुळे पालघरमधील मनसेच्या राजकारणात मोठी खळबळ उडाली आहे.

घटनेनंतर जखमींना तातडीने रुग्णालयात दाखल करण्यात आले. सुनील राऊत यांच्यावर उपचार सुरू असून त्यांच्या प्रकृतीवर डॉक्टरांकडून लक्ष ठेवले जात आहे.या घटनेमुळे मनसेतील अंतर्गत मतभेद पुन्हा एकदा ऐरणीवर आले असून, पक्ष नेतृत्व या प्रकरणाची दखल घेणार का, याकडे कार्यकर्ते आणि राजकीय वर्तुळाचे लक्ष लागले आहे. पक्षाच्या कार्यालयातच हाणामारीची घटना झाल्यानं परिसरात खळबळ माजलीय.

रायगडमध्ये मनसेला मोठा धक्का, बड्या नेत्यासह पदाधिकाऱ्यांचे तडकाफडकी राजीनामे

राज ठाकरेंच्या रायगड जिल्ह्याच्या दौऱ्याआधीच मनसेला मोठा धक्का बसलाय. जिल्हा पातळीवरील पदाधिकाऱ्यांनी तडकाफडकी राजीनामे देत शिंदे गटात प्रवेश केला आहे. मनसे माजी रायगड संपर्क अध्यक्ष दिलीप सांगळे, विद्यार्थी सेना रायगड जिल्हा अध्यक्ष प्रतिक रहाटे, रोहा तालुका अध्यक्ष बाबू फुलारे, माथाडी अध्यक्ष राजा टेंबे या प्रमुख पदाधिकाऱ्यांचा समावेश आहे. या सर्वांनी पक्षातील पद आणि प्राथमिक सदस्यत्वाचा राजीनामा देत शिंदे गटात प्रवेश केलाय.