Boisar News:

पालघरमधून एक खळबळजनक घटना समोर आली आहे. दोन कामगारांना विद्युत तारांचा शॉक लागलाय. विद्युत प्रवाह जास्त असल्याने त्यांना जोरदार झटका बसला. या घटनेत एका कामगाराचा जागीच मृत्यू झालाय. तर एक जण गंभीर जखमी आहे. जखमी तरुणावर रुग्णालयात उपचार सुरू आहेत.

मिळालेल्या अधिक माहितीनुसार, बोईसरच्या ओसवालमधील सत्यम या इमारतीच्या रंगरंगोटीचे काम सुरू असताना उंचावर असलेल्या विद्युत वाहिनीला स्पर्श झाल्याने ही दुर्घटना घडली. या दुर्घटनेत संदेश गोवारी या कामगाराचा मृत्यू झाला. तर उत्तम सातवी हा कामगार गंभीर जखमी झाला आहे. जखमी कामगारावर साईलीला हॉस्पिटलमधील अतिदक्षता विभागात उपचार सुरू करण्यात आले आहेत.

दरम्यान, बोईसरमध्ये कारखान्यांसह परिसरात काम करणाऱ्या कामगारांच्या सुरक्षेचा प्रश्न पुन्हा एकदा ऐरणीवर आला आहे. सुरक्षिततेसाठी योग्य ती काळजी आणि सामग्री न वापरल्याने अशा दुर्घटनांमध्ये दिवसेंदिवस वाढ होत आहे. संबंधित विभाग मात्र या सगळ्याकडे दुर्लक्ष करताना दिसून येत आहे.