उस्मानाबाद: शेतकऱ्यांचे पिकविमा अनुदानासह विविध मागण्यांसाठी शिवसेनेच्या ठाकरे गटातील आमदार कैलास पाटील (Kailas Patil) यांनी आंदोलन केलं आहे. गेल्या सात दिवसांपासून जिल्हाधिकारी कार्यालयासमोर आमरण उपोषण सुरु आहे. आता हे उपोषण तात्पुरतं स्थगित करण्यात आलं आहे. या आंदोलनाला जिल्ह्याभरातून मोठा प्रतिसाद मिळत आहे. (mla kailas patil strike against Maharashtra government)

मिळालेल्या माहितीनुसार, विधान परिषदेचे विरोधी पक्षनेते अंबादास दानवे यांनी आमदार कैलास पाटील यांच्या उपोषणस्थळी जाऊन भेट दिली. यावेळी दानवे यांनी उपमुख्यमंत्री देवेंद्र फडणवीस यांना फोन लावला. आमदार कैलास पाटील यांच्याशी उपमुख्यमंत्री देवेंद्र फडणवीस यांनीही संवाद साधला, यावेळी उपोषण शेतकऱ्यांच्या मागण्यांसाठी चर्चा झाली.

यावेळी शिवसेना पक्ष प्रमुख उद्धव ठाकरे यांनाही फोन लावण्यात आला होता. उध्दव ठाकरे यांचीही कैलास पाटील यांच्यासोबत फोनवर चर्चा झाली. उध्दव ठाकरे यांनी कैलास पाटील यांना उपोषण मागे घेण्याची सूचना केली. त्यानुसार आमदार कैलास पाटील यांनी आपलं उपोषण (Fast Stike) तात्पुरतं स्थगित केलं आहेत.

यावेळी उपोषणस्थळी त्यांची मुलगी आराध्या आणि पुतणी राजेश्वरी ह्या आल्या होत्याय त्यानंतर एकच भावनिक वातावरण तयार झाले. एक मुलगी आणि पित्याचे नाते किती घट्ट असते हे यावेळी पाहायला मिळाले. आंदोलतून चला असे म्हणत या दोघींनी अनेक वेळा आमदार पाटील यांचे हात ओढले, त्यानंतर गळयात पडून गालावर गोड पापा घेतला. कैलास पाटील यांना ग्रामीण भागातूनही अनेक महिला शेतकरी येऊन भेटत होत्या आणि डोळ्यात अश्रू आणत असून आंदोलन मागे घेण्याची विनंती करत होत्या. (Maharashtra News)

दरम्यान, या आंदोलनाला २८ ऑक्टोबरला हिंसक वळण लागले होते. शिवसेनेच्या (shivsena) कार्यकर्त्यांनी एसटी बस फोडून हे आंदोलन चिघळवले. आंदोलन करूनही शासनाने कोणत्याच प्रकारची दखल घेतली नसल्याने कार्यकर्त्यांनी आक्रमक पवित्रा घेतला होता. कार्यकर्त्यांनी दोन शहरात दोन ठिकाणी बस फोडून निषेध करत जोरदार जोरदार घोषणाबाजी केली होती. मात्र, आता तात्पुरतं हे उपोषण स्थगित करण्यात आलं आहे.

Edited By - Akshay Baisane