कैलास चौधरी -

उस्मानाबाद: देवदर्शनाहून परतताना भाविकांच्या वाहनाला भीषण अपघात झाला. या अपघातात (Accident) दोन भाविकांचा मृत्यू झाला. तर दहा जण जखमी झाले आहेत. परंडा-सोनारी रस्त्यावर खानापूर पाटीजवळ हा अपघात झाला. जखमींना उपजिल्हा रुग्णालयात उपचारासाठी दाखल करण्यात आलं आहे.

मिळालेल्या माहितीनुसार, शनी शिंगणापूर (Shani Shinganapur) येथून देवदर्शन करून भाविक पीकअपने घरी निघाले होते. त्याचवेळी परंडा-सोनारी रस्त्यावर खानापूर पाटीजवळ पीकअपला भीषण अपघात झाला. यात भूम तालुक्यातील नळेगाव येथील दोघांचा मृत्यू झाला. तर दहा जण गंभीर जखमी झाले. काल, बुधवारी रात्री ११ वाजताच्या सुमारास ही घटना घडली.

भूम (Bhum) तालुक्यातील वडगाव नळी येथील भाविक शनी शिंगणापूर येथील कावड यात्रा घेऊन पीकअप वाहनाने गावाकडे परतत होते. परंडा- सोनारी रस्त्यावर खानापूर पाटीजवळ पीकअप आणि उस वाहतूक करणाऱ्या ट्रॅक्टरची धडक झाली. यात २६ वर्षीय मंगेश गायकवाड याच्यासह अन्य एका तरुणाचा मृत्यू झाला. तर पीकअपमधील इतर दहा भाविक गंभीर जखमी झाले. त्यांना उपजिल्हा रुग्णालयात उपचारासाठी दाखल करण्यात आले आहे.

Edited By - Jagdish Patil