कृषिमंत्री माणिकराव कोकाटे यांचा ऑनलाईन रमी गेम खेळल्याचा व्हिडीओ व्हायरल झाला. त्यानंतर राज्यात ऑनलाईन रमी गेमची चर्चा संपूर्ण राज्यात सुरू झाली. पण या ऑनलाईन रमी गेमच्या व्यसनामुळे असंख्य तरुण कर्जबाजारी झाल्याचं चित्र आहे. या खेळाची जाहिरात टीव्ही सर्रासपणे दाखवली जाते. पण या गेमच्या आहारी जाऊन अनेक तरुण कर्जबाजारी होत आहेत.

सोलापूर जिल्ह्यातील करमाळा येथील जय जाधव नावाच्या तरुणाने या गेमच्या नादात घर, शेती, गमावलीय. गेमच्या व्यसनापायी २६ वर्षीय जय जाधव यांच्यावर ८० लाखांचं कर्ज झालंय. जय जाधव हा तरुण शेतकरी कुटुंबातील मुलगा आहे. त्याला ऑनलाईन रमी गेमचं व्यसन लागलं. गेमच्या व्यसनात त्यांच्या डोक्यावर तब्बल ८० लाख रुपयाचं कर्ज झालंय. याबाबतची वृत्त एका मराठी वृत्तसंस्थेनं दिलंय.

जयने रमीच्या नादात रिअल इस्टेट व्यवसायातून कमावलेले २३ लाख, मित्रांकडून घेतलेले २० लाखांचं कर्ज, दीड एकर शेतजमीन, स्कॉर्पिओ गाडी गहाण ठेवून आणलेले पैसे, हे सर्व काही गमावलं. महाराष्ट्रात ऑनलाईन जुगार, विशेषतः रमी, पोकर, आणि क्रिकेट बेटिंग यांचे व्यसन झपाट्याने वाढू लागेल आहेत. पुणे, ठाणे, औरंगाबाद, नागपूरसारख्या शहरी भागांपासून ते ग्रामीण भागातील युवक या खेळाच्या आहारी गेले आहेत.

गेमच्या जाहिरातीवर आमदार बच्चू कडूंचा संताप

कृषीमंत्री माणिकराव कोकाटे यांच्या व्हायरल व्हिडिओवरून टीका करताना बच्चू कडू यांनी जाहिरातीवरून टीका केलीय. रमी खेळामुळे अनेकांचा संसार उद्धवस्त झालाय. अनेकजण कर्जबाजारी झाल्याचं बच्चू कडू म्हणाले. या गेममुळे मोठ्या प्रमाणात आत्महत्या झाल्या आहेत तरीही गेमवर बंद का घातली जात नाही, असा सवाल बच्चू कडू यांनी केलाय. त्याबरोबर त्यांनी जाहिरात करणाऱ्या सिनेस्टार आणि क्रिकेटर्सवर टीका केलीय. क्रिकेटर सिनेस्टार हे त्या गेमची जाहिराती करतात, त्यांना लाज का वाटत नाही. जाहिरात करणारे भिकारचोटा पेक्षाही भिकारचोट आहेत, असं बच्चू कडू म्हणालेत.