लोकसभा निवडणुकीत महायुतीला सर्वाधिक फटका बसला तो मराठा आरक्षणाचा आणि हे दुसरं तिसरं कुणी नव्हे तर खुद्द फडणवीसांनीच हे मान्य केलंय. याचा सर्वाधिक फटका मराठवाड्यात बसल्याचं दिसलं. कारण मराठा-ओबीसींमध्ये मोठं जातीय ध्रुवीकरण झालं.

अजित पवारांनीही बीड, परभणीसह काही जिल्ह्यात मराठे आणि मराठेत्तर अशी निवडणूक झाल्याचं सांगितलं आहे. मात्र अजित पवारांच्या राष्ट्रवादीचे मंत्री छगन भुजबळ यांना हे मान्य नाही. मराठा आरक्षणाच्या वादामुळे आम्ही पडलो, असे समजू नका. कारण विदर्भात तो वाद नव्हता. तिथेही आपला पराभव झाल्याचा दावा भुजबळांना केलाय.

भुजबळांनी असा दावा केला असला तरी निकालांच्या विश्लेषणातून मात्र मराठा आरक्षणाच्या फटका बसल्याचं समोर आलंय. यातच भुजबळांनी केलेल्या दाव्याबाबत जरांगेंना पत्रकारांनी विचारले असता ते म्हणाले की, थोडं थांबा कळेल तुम्हाला.

मनोज जरांगे-पाटील यांनी मराठा आरक्षणासाठी पुन्हा एकदा आमरण उपोषण सुरु केलंय. त्यांची प्रकृती खालावत चाललीय. त्यात त्यांनी उपचार घेण्यास नकार दिलाय. त्यामुळे हे उपोषण चिघळण्याची शक्यता आहे.

भुजबळ आणि जरांगेंचं विळ्या-भोपळ्याचं नातं सा-या महाराष्ट्राला परिचित आहे. मात्र भुजबळांनी आता पुन्हा मराठा आरक्षणाच्या मुद्याला हवा दिलीय. त्यामुळे आगामी विधानसभा निवडणुकीतही महायुतीसाठी हा मुद्दा पुन्हा डोकेदुखी वाढवणार का याकडे लक्ष लागलंय.