मुंबई : विधानसभा निवडणुकांच्या पार्श्वभूमीवर राज्यातील राजकीय घडामोडी वेगाने सुरु आहेत. कोकण हा शिवसेनेचा बालेकिल्ला आहे. लोकसभेला ठाकरे गटाची कोकणात पिछेहाट झाली. आता विधानसभेसाठी ठाकरे गट जोर लावत असतानाच ठाकरेंचे राजकीय शत्रू राणेंनी मोठा डाव टाकलाय. माजी खासदार निलेश राणे हाती शिवबंधन बांधणार आहेत. तब्बल २० वर्षानंतर राणेंच्या हाती धनुष्यबाण येणार आहेत. मुख्यमंत्री एकनाथ शिंदे यांनी पक्षप्रवेशाबाबत माहिती दिली. 'नारायण राणेंनी ज्या चिन्हावर राजकारणात सुरुवात झाली, त्याच चिन्हावर मी आता निवडणूक लढवणार असल्याचे निलेश राणे म्हणाले.

भाजपमधून शिवसेनेत जाणाऱ्या निलेश राणेंनी भाजप नेत्यांचं गुणगाण गायलय. देवेंद्र फडणवीसांनी लहान भावाप्रमाणे सांभाळलं. रवींद्र चव्हाण यांनीही लहान भावाप्रमाणे वागणूक दिली. सगळ्याच नेत्यांनी चांगली वागणूक दिली हे सांगायला निलेश राणे विसरले नाहीत. दिवंगत बाळासाहेब ठाकरे हे माझे कायम दैवत आहेत, ते कायम दैवत राहतील, असेही त्यांनी म्हटलंय.

कुडाळमधून निलेश राणे निवडणूक लढणार आहेत. कुडाळ मतदारसंघ हा नारायण राणे यांचा पारंपरिक मतदारसंघ म्हणून ओळखला जातो. मात्र सलग दोन वेळा या मतदारसंघातून शिवसेना ठाकरे गटाचे वैभव नाईक निवडून आले होते. त्यांनी २०१४ मध्ये नारायण राणे यांचा परभाव केला होता. तर २०१९ मध्ये भाजपच्या रणजीत देसाई यांना धूळ चारली होती.

कुडाळ आणि मालवण या दोन तालुक्याना मिळून कुडाळ मतदारसंघ तयार झाला असून यंदा बदलत्या राजकीय समिकरणामुळे मतदारसंघात शिवसेना विरुध्द शिवसेना लढत पहायला मिळण्याची शक्यता आहे. येत्या विधानसभा निवडणुकीच्या निमित्ताने कोकणातील राजकारण कोणत्या दिशेने जाणार हे पाहणं उत्सुकतेचं आहे.