सोलापूर: सोलापुरात राष्ट्रवादी (NCP) युवक काँग्रेसने महागाई विरोधात एक आगळ वेगळे आंदोलन केले आहे. राष्ट्रवादी युवक काँग्रेसच्यावतीने पेट्रोल (Petrol) पंपावर प्रतिकात्मक स्वरुपात जनतेला कमळाची फुले वाटप करून " एप्रिल फुल " केले आहे. तसेच पंतप्रधान नरेंद्र मोदी यांचे छायाचित्र असलेला निषेधाचा केक कापून आगळ्यावेगळ्या पद्धतीने निषेध नोंदविण्यात आला आहे.

राष्ट्रवादी (NCP) युवकचे सोलापूर (Solapur) शहराध्यक्ष जुबेर बागवान यांच्या नेतृत्वाखाली अक्कलकोट रोडवरील पेट्रोल पंपावर हे आंदोलन करण्यात आले. यावेळी पेट्रोल (Petrol) भरण्यासाठी आलेल्या वाहधारकांना कमळाचे प्रतिकात्मक फुल देऊन निषेधाच्या घोषणा देण्यात आल्या.

कमल का फुल, एप्रिल फुल, मोदी सरकार (Modi Government) हाय हाय,एक ही भूल, कमल का फुल, महागाई कमी करण्यात अपयशी ठरलेल्या भाजप सरकारचा धिक्कार असो, देशाचे वाटोळे करणाऱ्या मोदी सरकारचा धिक्कार असो, पेट्रोल शंभरी पार, मोदी सरकार खुशाल यार, सामान्य जनतेला बेकारीच्या खाईत लोटणाऱ्या मोदी सरकारचा धिक्कार असो, अशा घोषणा यावेळी देण्यात आल्या आहेत.

आजपासून काँग्रेसही (Congress) राज्यात आंदोलन सुरु करणार आहे. काँग्रेस तालुका, जिल्हा पातळीवर भाजप (BJP) विरोधात आंदोलन करणार आहे. हे आंदोलन 1 ते 7 एप्रिल चालणार आहे. देशात पुन्हा इंधन दरवाढ सुरु झाली आहे. या विरोधात विरोधी पक्ष आक्रमक झाले आहेत.