राजकीय वर्तुळातून पुन्हा एकदा धक्कादायक बातमी समोर आली आहे. काही दिवसांपूर्वी शरद पवार गटाचे प्रवक्ते विकास लवांडे यांच्यावर शाईफेक करण्यात आल्याची घटना घडली होती. किर्तनकार संग्राम भंडारे यांच्यासह दहा ते पंधरा गोरक्षकांनी हल्ला केला होता. त्यानंतर पुन्हा एकदा सुनेत्रा पवारांच्या राष्ट्रवादीच्या महिला नेत्यावर मंगळवारी पहाटे हल्ला झाल्याची घटना उघडकीस आली आहे. धुळ्यातील राष्ट्रवादीच्या नेत्या रिता बाविस्कर यांच्या वाहनावर हल्ला झाल्याची घटना घडली आहे.

राष्ट्रवादीच्या नेत्या रिता बाविस्कर यांच्या वाहनावर धुळे तालुक्यातील वनी गावाजवळ गोरक्षकांनी पहाटेच्या तीन वाजेच्या सुमारास हल्ला केल्याचा प्रकार उघडकीस आलाय. बाविस्कर या आपल्या वाहनातून काही कामानिमित्त अमळनेर येथून धुळेमार्गे आपल्या वाहनातून जात होत्या. त्यावेळी धुळे तालुक्यातील वणी याठिकाणी कथित गोरक्षकांनी संबंधित वाहनात गोवंश जनावरे चोरून नेले जात असल्याच्या संशयावरून संबंधित वाहन रोखली. त्यानंतर लोखंडी खिळ्यांचा रॉड टाकून वाहन अडविण्याचा प्रयत्न केला.

या घटनेमध्ये राष्ट्रवादी काँग्रेस पक्षाच्या नेत्या रीता बाविस्कर या थोडक्यात बचावल्या. या संदर्भात रिता बाविस्कर यांनी धुळे तालुका पोलीस ठाण्यात या कथित गोरक्षकांच्या विरोधात तक्रार दिली आहे. धुळे तालुका पोलिसांनी बाविस्कर यांच्या वाहनावर हल्ला करणाऱ्या तीन जणांविरोधात गुन्हा दाखल करीत दोन जणांच्या मुसक्या देखील आवळल्या आहेत. तर एक जण अद्याप फरार असून त्याचा पुढील तपास धुळे तालुका पोलीस करीत आहेत.

लवांडे यांच्यावर शाई फेकत धक्काबुक्की केल्याचा आरोप

शरद पवार गटाचे प्रवक्ते विकास लवांडे यांच्यावर काही दिवसांपूर्वी शाइफेक करण्यात आली आहे. संग्राम भंडारे आणि दहा ते पंधरा गोरक्षकांनी शाईफेक केल्याचा व्हिडिओ सोशल मीडियावर व्हायरल झाला. पुण्यातील हवेली येथे प्रवचन संपल्यानंतर सकाळी दहा वाजता निघाले. त्यानंतर रस्त्यात भंडारे यांनी लवांडे यांना रोखलं. त्यानंतर त्यांच्या अंगावर शाईफेक केली. त्यानंतर शाईफेक करत धक्काबुक्की करून पिस्तुल दाखवल्याचाही आरोप विकास लवांडे यांनी केला. काही दिवसांपूर्वी लवंडे यांनी वारकरी सांप्रदायात प्रतिगामी घुसल्याचे म्हणत २० जणांची यादी जाहीर केली होती. या यादीवरूनच भंडारे यांनी शाईफेक केल्याचे सांगण्यात येत आहे.