ऐकलंत. माजी मंत्री धनंजय मुंडेंनी आपल्याच प्रदेशाध्यक्षांकडे काहीतरी काम देण्याची मागणी केलीय.आणि त्याला कारण ठरलंय.6 महिन्यांपूर्वी मंत्रिपदाचा राजीनामा दिल्यानंतर आलेला निवांतपणा. मंत्रिपद गेल्यानंतर विजनवासात गेलेले धनंजय मुंडे आरक्षणाच्या मुद्दयावरून पुन्हा राजकारणात अॅक्टिव्ह झाले असले तरी त्यांच्याकडे पक्षाची किंवा कुठल्याच कामाची ठोस जबाबदारी नाही. त्यातच आता मुंडेंनी काम देण्याची मागणी केल्यानं राजकीय वर्तुळात अनेकांच्या भुवया उंचावल्यात.

मात्र धनंजय मुंडेंच्या या मागणीनंतर अंजली दमानिया आक्रमक झाल्यात. मुंडेंना सार्वजनिक कामांशी संबंधित कोणतीही जबाबदारी देऊ नये, अशी मागणी केलीय. तर जरांगेंनी मुंडेंसाठी रोजगार हमीचा पर्याय सुचवलाय.दुसरीकडे गोपिनाथ मुंडेंचं स्वप्न साकार करण्यासाठी धनंजय मुंडेंनी ओबीसी आंदोलनात साथ देण्याचं आवाहन मंत्री छगन भुजबळांनी केलंय. तर अजित पवारांनी एका वाक्यात मुंडेंच्या मागणीवर उत्तर दिलंय.

धनंजय मुंडेंचा निकटवर्तीय वाल्मिक कराड गँगने निष्पाप सरपंच संतोष देशमुखांची हैवानालाही लाजवेल अशी हत्या केली. त्यामुळे मुंडेंचं मंत्रिपद गेलं. पुढे मुंडे तब्बल 6 महिने विजनवासात गेले होते. मात्र आता राज्यात आरक्षणाचा वाद पेटल्यानंतर धनंजय मुंडे अॅक्टिव्ह झाले. मात्र कुठलीही राजकीय जबाबदारी नसल्याने साईड लाईन झालेल्या मुंडेंची आता नटसम्राट चित्रपटातील कुणी घर देतं का घरं. अशाच प्रकारे कुणी काम देतं का काम? अशीच अवस्था झालीय.