नवी मुंबई : नवी मुंबई राहणाऱ्या नागरिकांसाठी एक महत्त्वाची बातमी आहे. ती म्हणजे, महानगरपालिका क्षेत्रातील पाणीपुरवठ्याबाबत अत्यंत महत्त्वाची बातमी आहे. नवी मुंबई महानगरपालिका कार्यक्षेत्रामध्ये पाणीपुरवठा करणारी मोरबे धरणाची मुख्य जलवाहिनी सी.बी.डी. बेलापूर, सेक्टर २८ येथे आज लिकेज झालेला आहे. सदर ठिकाणी तातडीने पाईप लाईन दुरुस्तीचे काम उद्या शुक्रवार २८ मार्च रोजी सकाळी ११.०० वाजता हाती घेण्यात येणार आहे.

त्यासाठी भोकरपाडा जलशुद्धीकरण केंद्र येथून नवी मुंबई महानगरपालिका क्षेत्रास होणारा पाणीपुरवठा उद्या २८ मार्च रोजी सकाळी ११.०० ते सायंकाळी ६.०० वाजेपर्यंत बंद करावा लागणार आहे. त्यामुळे नवी मुंबई महानगरपालिका क्षेत्रास आणि सिडको क्षेत्रातील खारघर आणि कामोठे येथे होणारा उद्या संध्याकाळचा पाणी पुरवठा बंद राहणार आहे. तसेच शनिवारी २९ मार्च रोजी सकाळचा पाणीपुरवठा कमी दाबाने होणार असल्याचं महापालिकाने सांगितलं आहे. दरम्यान, या कालावधीत नागरिकांनी पाणी जपून वापरावे आणि नवी मुंबई महानगरपालिकेस कृपया सहकार्य करावे, असं आवाहन करण्यात आलं आहे.

नवी मुंबई महानगरपालिकेमार्फत उद्या शुक्रवार २८ मार्च रोजी सकाळी ११ ते ६ वाजेपर्यंत एकूण ७ तास बंद राहणार आहे. त्यामुळे नवी मुंबई महानगरपालिका क्षेत्रातील बेलापूर, नेरुळ, वाशी, तुर्भे, सानपाडा, कोपरखैरणे, घणसोली आणि ऐरोली या विभागात उद्या संध्याकाळी पाणी पुरवठा होणार नाहीय. तसेच या कालावधीत महानगरपालिका क्षेत्रातील जलवाहिनीवरील थेट नळजोडण्यांचा आणि सिडको क्षेत्रातील कामोठे आणि खारघर नोडमधील पाणी पुरवठा देखील बंद राहील, असं महानगरपालिकेनं सांगितलं आहे.