सिद्धेश म्हात्रे  
नवी मुंबई : सायबर गुन्हेगारांकडून फसवणूक करण्याचे वेगवेगळे तंत्र वापरत असल्याचे समोर आले आहे. आता तर थेट नवी मुंबई पोलीस आयुक्त मिलिंद भारंबे यांचे नाव वापरून पुण्यातील तरुणाची लाखो रुपयांत फसवणूक केल्याचे प्रकरण समोर आले आहे. या प्रकरणी तरुणाने दिलेल्या तक्रारीवरून तीन जणांविरुद्ध गुन्हा दाखल करण्यात आला आहे. 

सायबर गुन्हेगारांकडून समोरच्या व्यक्तीला फोन करून भीती दाखविली जाते. यातून पैसे उकडण्याचे काम केले जात असते. दरम्यान पुण्यातील एका तरुणाला फोन करून (Navi Mumbai) नवी मुंबई पोलीस आयुक्तांचे नाव सांगत मनी लॉन्ड्रिंग बाबत चौकशी करण्याच्या बहाण्याने तब्बल १० लाख रुपये उकळण्यात आल्याचे समोर आले आहे. नवी मुंबईचे पोलीस आयुक्त मिलिंद भारंबे यांचे नाव आणि खोटे कागदपत्र दाखवत ही फसवणूक (Cyber Crime) करण्यात आली आहे. याप्रकरणी तरुणाने विश्रामबाग पोलीस ठाण्यात फिर्याद दिल्यानंतर ३ जणांवर फसवणुकीचा गुन्हा दाखल करण्यात आला. 

मुंबईतील फेडेक्स कुरिअर कंपनीमधून मुंबई क्राईम ब्रांचचे अधिकारी मिलिंद भारंबे बोलतोय असे सांगून इराणला कुठले पार्सल पाठवले आहे; अशी विचारणा केली. यातून बचाव करण्याच्या माध्यमातून ही फसवणूक करण्यात आली असून याप्रकरणी पोलीस आयुक्त मिलिंद भारंबे यांनी अश्या प्रकरणी तात्काळ पोलीस ठाण्यात तक्रार करावी असे आवाहन नागरिकांना केले.