अजय सोनवणे 
येवला (नाशिक) : दोन दिवसांपूर्वी संभाजीनगरच्या वाळूज परिसरात शेतकऱ्यांच्या घरावर सशस्त्र दरोडा टाकल्याची घटना घडली होती. यानंतर आता नाशिकच्या येवला तालुक्यातील कोळम या ठिकाणी आवारे वस्तीवर मध्यरात्रीच्या सुमारास सशस्त्र दरोडा टाकण्यात आला आहे. यात घरात असलेल्या महिला व पुरुषांना दरोडेखोरांनी बेदम मारहाण करत दागिने व रोख रक्कम लुटून नेल्याची घटना घडली आहे. या घटनेने परिसरात प्रचंड खळबळ उडाली आहे. 

नाशिकच्या येवला तालुक्यातील कोळम परिसरातील वस्तीवर आज रात्रीच्या सुमारास हा धक्कादायक घटना घडली आहे. उन्हाळ्याचे दिवस असल्यामुळे गाव वस्तीवर अनेक कुटुंब घराबाहेर झोपत असतात. त्यानुसारच कोळम वस्तीवर असलेल्या आवारे कुटुंबातील पुरुष रात्री घराबाहेर ओट्यावर झोपले होते. मध्यरात्रीच्या सुमारास अख्खी वस्ती गाढ झोपेत असताना चार ते पाच जणांनी येथे येत दरोडा टाकला. 

चिमुकलीच्या गळ्यावर चाकू लावत जबरी लूट 

घराबाहेर झोपलेल्या पुरुषांना जाग आल्यानंतरते उठले असता या दरोडेखोरांनी त्यांना चाकूचा धाक दाखवून दरवाजा उघडण्यास भाग पाडले. यानंतर या दरोडेखोरांनी घरात प्रवेश करत झोपलेल्या चार वर्षाच्या चिमुरडीच्या गळ्यावर चाकू लावून महिलांना मारहाण केली. तसेच चाकूचा धाक दाखवून घरातील महिलांना मारहाण करत त्यांच्या अंगावरील सोने तसेच कपाटातील ५० हजार रुपये रोकड चोरून नेली.   

परिसरात भीतीचे वातावरण 

दरम्यान दरोडेखोरांनी केलेल्या मारहाणीत घरातील दोन महिला जखमी झाल्या आहेत. जखमी झालेल्या दोघी महिलांवर शासकीय रुग्णालयात उपचार कारण्यात आले आहे. तर घटनेची माहिती येवला पोलिसांना देण्यात आली. पोलिसांनी घटनास्थळी येत पंचनामा करत तपासाला सुरवात केली आहे. या घटनेमुळे परिसरात भीतीचे वातावरण असून पोलिसांनी तात्काळ दरोडेखोरांचा बंदोबस्त करावा अशी मागणी होत आहे.