नाशिक : नाशिक (Nashik) जिल्ह्यात मंगळवारी दुपारच्या सुमारास एक थरारक घटना घडली. मनमाड (Manmad) जवळच्या अंकाई किल्ल्यावरील तलावात दोन तरुण बुडाले. दोन्ही तरुण किल्ल्यावरील अगस्तीमुनीच्या दर्शनाला आले होते. किल्ला फिरून झाल्यानंतर ते तलावात अंघोळीसाठी उतरले. दरम्यान, तलावातील पाण्याचा अंदाज न आल्याने दोघेही बुडाले. (Nashik Manmad Todays News)

नेमकं काय घडलं?

सध्या राज्यभरात पावसाचा धुमाकूळ सुरू आहे. त्यामुळे पर्यटनस्थळावर फिरण्यासाठी नागरिक गर्दी करताहेत. मनमाड जवळच्या अंकाई किल्ल्यावरही शेकडो नागरिक येत असतात. अशातच अहमदनगर जिल्ह्यातील कोपरगाव परिसरातील दोन मित्र, मिलींद रविंद्र जाधव आणि रोहित राठोड हे अंकाई किल्ल्यावरील अगस्तीमुनीच्या दर्शनाला आले होते.

किल्ला फिरून झाल्यानंतर दोघेही अंघोळीसाठी तलावातील पाण्यात उतरले. त्यातील एकाला पाण्याचा अंदाज न आल्याने तो बुडू लागला. आपला मित्र बुडत असल्याचं बघून दुसऱ्याने तातडीने त्याच्याकडे धाव घेतली. मात्र, त्याला वाचवण्याचा नांदात दुसराही मित्र बुडाला. (Manmad Ankai Fort Todays News)

दरम्यान, किल्ल्यावरील काही जणांना याची माहिती मिळताच त्यांनी किल्ल्याच्या पायथ्याशी असलेल्या अंकाई गावातील नागरिकांना तातडीने याची माहिती दिली. घटनेची माहिती मिळताच परिसरातील नागरिकांनी घटनास्थळी धाव घेतली.

दोघांचेही मृतदेह पाण्याबाहेर काढण्यात आले. मित्राला वाचवण्याचा नांदात दुसऱ्याचाही मित्राचा मृत्यू झाल्याने परिसरातून हळहळ व्यक्त केली जात आहे.

Edited By - Satish Daud