तबरेज शेख 
नाशिक : विधानसभा निवडणुकीच्या अनुषंगाने पक्ष बदल करण्याचे वारे सुरु आहेत. तर दुसरीकडे नेत्यांच्या प्रचार सभा होत आहेत. दरम्यान नाशिकमध्ये राज ठाकरे हे दौऱ्यावर येणार असून दौऱ्याआधीच नाशिकमध्ये मनसेला मोठा धक्का बसला आहे. नाशिकमधील मनसेचा मोठा नेता ठाकरे गटात प्रवेश करणार आहे. 

महाराष्ट्र नवनिर्माण सेनेचे नाशिकमधील (Nashik News) प्रमुख पदाधिकारी व नाशिक महापालिकेचे माजी महापौर अशोक मुर्तडक यांनी मनसेला रामराम ठोकला आहे. नाशिकच्या विधानसभा निवडणुकीसाठी ते इच्छुक होते. मात्र याठिकाणी प्रसाद सानप यांना उमेदवारी देण्यात मुर्तडक हे नाराज होते. यामुळे त्यांनी पक्ष सोडून शिवसेना (Shiv Sena) उद्धव ठाकरे गटात प्रवेश करणार आहेत. दरम्यान त्यांच्या समर्थकांनी देखील पक्षाच्या सदस्यत्व पदाचा राजीनामा दिला आहे. 

अडीच वर्ष होते महापौर 

अशोक मुर्तडक हे मनसेची (MNS) सत्ता असताना अडीच वर्ष महापौर होते. मनसेच्या काळात त्यांनी अनेक चांगली विकासाचे कामे केली होती. आज सायंकाळी उद्धव ठाकरे यांची नाशिकमध्ये जाहीर सभा असून या सभेमध्ये मनसेचे माजी महापौर अशोक मुर्तडक हे प्रवेश करणार आहेत. अशोक मुर्तडक यांच्या प्रवेशाने नाशिक पूर्वची महाविकास आघाडीची ताकद वाढणार असून अशोक मुर्तडक हे महाराष्ट्र नव निर्माण सेनेत प्रदेश सरचिटणीस या पदावर होते.