अजय सोनवणे 

मनमाड (नाशिक) : वाडवस्तीमध्ये बिबट्याचा वावर मागील काही दिवसांपासून वाढला आहे. यातच लासलगाव येथे बिबट्याच्या हल्ल्यात दोन शेळ्या ठार झाल्या आहेत. कांद्याच्या गोडाऊनमध्ये बांधलेल्या शेळ्यांवर बिबट्याने हल्ला केला, बिबट्याचा शेळ्यांवरील हल्ला सीसीटीव्ही कॅमेरात कैद झाला आहे. 

नाशिकच्या (Nashik) लासलगाव- विंचूर रोडवर असलेल्या दानिश खलील शेख यांचे कांद्याचे गोडाऊन आहे. या गोडाऊनमध्ये कांदा साठवणूक केली असून रक्षणासाठी सुरक्षा रक्षक देखील ठेवला आहे, दरम्यान या गोडाऊनमध्ये सुरक्षा रक्षकाने आपल्या दोन शेळ्या बांधलेल्या होत्या. या शेळ्यांवर रात्रीच्या सुमारास अचानक बिबट्याने (Leopard Attack) येत हल्ला केला. यात दोनही शेळ्या जागीच ठार झाल्या असून बिबट्याचा शेळ्यांवरील हल्ल्याची घटना सीसीटीव्हीमध्ये कैद झाल्याने हा व्हिडीओ व्हायरल झाला आहे. 

शेतकऱ्यांमध्ये भीतीचे वातावरण 

सदर घटनेमुळे परिसरातील शेतकऱ्यांसह या कांदा गोडाऊनवर कांदा प्रतवारी व पॅकिंग साठी येणाऱ्या कामगारांमध्ये ही भीतीचे वातावरण पसरले आहे. या बिबट्याला वनविभागाने पिंजरा लावत जेरबंद करावे; अशी मागणी वन विभागाकडे करण्यात आली आहे.