तबरेज शेख 
नाशिक : नाशिकमध्ये बुधवारी संध्याकाळपासून जोरदार पाऊस सुरु आहे. आज सकाळी देखील नाशिक शहरासह जिल्ह्याला मुसळधार पावसाने झोडपुन काढले आहे. यामुळे अनेक भागातील रस्त्यांवर पाणी साचले आहे. तर मुसळधार पावसामुळे पावसाचे पाणी सातपूर परिसरातील नागरिकांच्या घरात शिरले आहे. यामुळे जनजीवन विस्कळीत झाले आहे. 

राज्यातील अनेक मॉन्सूनचा पाऊस सक्रिय झाला आहे. अनेक भागांमध्ये कालपासून जोरदार पाऊस होत असून आज सकाळी देखील मुसळधार पाऊस होत आहे. तर नाशिक शहरासह जिल्ह्याला आज मुसळधार पावसाने झोडपले आहे. या मुसळधार पावसाने त्र्यंबकेश्वर शहरातील रस्ते जलमय झाले असून त्र्यंबकेश्वर गावातील कुशावर्त, निवृत्तीनाथ महाराज मंदिर, बाळलेश्वर चौक या भागातील रस्त्यांवर पुराचं पाणी आले आहे. तर अनेक घर आणि वाड्यांमध्ये देखील पाणी शिरल्याने नुकसान झाले आहे. 

सातपूर परिसरातील घरांमध्ये पाणी  

नाशिकच्या सातपूर परिसरात प्रभाग क्रमांक दहा मधील राधाकृष्ण नगरमध्ये पावसाचे पाणी मोठ्या प्रमाणात नागरिकांच्या घरात शिरले आहे. त्यामुळे जनजीवन विस्कळीत झाले आहे. पावसाचे पाणी ड्रेनेज लाईनमध्ये जात नाही; असे स्थानिक नागरिकांनी सांगितले आहे. पाण्याला ड्रेनेज लाईनमध्ये योग्य उतार न दिल्यामुळे परिसरात पाणी साचत आहे. महापालिकेने या प्रश्नाकडे गांभीर्याने पहावे आणि नागरिकांच्या घरात शिरत असलेले पाणी चेंबरमध्ये जाण्याची व्यवस्था पुन्हा करावी; अशी मागणी परिसरातील नागरिकांनी केली आहे.

दारणा धरणातून पाणी सोडणार
नाशिक शहर व परिसरात मुसळधार पाऊस होत आहे. दारणा धरणाच्या पाणलोट क्षेत्रात मुसळधार पाऊस सुरू असल्याने धरणाच्या पाणी पातळीत वाढ झाल्याने दुपारी तीन वाजेपासून दारणा धरणातून ११०० क्युसेक वेगानं पाण्याचा विसर्ग सोडणार आहे. दारणा धरण ५० टक्के भरल्याने धरणातून पाण्याचा विसर्ग केला जाणार आहे. तर पावसाचा जोर वाढल्यास धरणातून पाण्याचा विसर्ग आणखी वाढवला जाण्याची शक्यता आहे.