नाशिक : आगामी सिंहस्थ कुंभमेळ्याच्या काही दिवसांपूर्वी कुंभमेळ्याच्या नावावरून सुरू असलेला वाद मिटतो न मिटतो तोच आता नवा वाद निर्माण झाला. कुंभमेळा आमच्याच जमिनीवर भरतो, मात्र आम्हाला का डावलता? कुंभमेळ्यासाठी शेत जमिनी आरक्षित झालेल्या शेतकऱ्यांनी थेट सरकारला सवाल विचारत कुंभमेळ्याच्या नियोजन बैठकीत सहभागी करून घेण्याची मागणी या शेतकऱ्यांनी केली आहे. 

नाशिक येथे होत असलेल्या आगामी सिंहस्थ कुंभमेळ्याची तयारी सुरू झाली आहे. कुंभमेळ्यासाठी तपोवनातील जागेवर वेगवेगळ्या आखड्यांसाठी साधू ग्राम उभारले जातात. २०१२ मध्ये झालेल्या सिंहस्थ कुंभमेळ्यासाठी साधुग्राम उभारण्यासाठी मोठ्या प्रमाणात शेतजमीन आरक्षित करण्यात आली. मात्र १२ वर्षानंतर देखील केवळ २० टक्केच जमीन भूसंपादित करण्यात आली. शेत जमिनीवर भूसंपादनाचे आरक्षण असल्याने शेतकऱ्यांना ना तिथे शेती करता येते, ना विकास. त्यामुळे शेतकऱ्यांमध्ये नाराजीचे वातावरण पसरले आहे. 

जमिनीचा मोबदला देण्याची मागणी 

आगामी कुंभमेळ्याची जय्यत तयारी होत असून शाहीस्नानाच्या तारीख देखील निश्चित केल्या जाणार आहेत. असे असताना ज्यांच्या जमिनीवर कुंभमेळ्याचा धार्मिक उत्सव होतो, त्या शेतकऱ्यांनी आता आवाज उठवला आहे. सिंहस्थ कुंभमेळ्याच्या नियोजनाच्या प्रत्येक बैठकीत शेतकऱ्यांना सहभागी करून घेण्याची मागणी या शेतकऱ्यांनी केली आहे. यासोबतच जमिनीचा मोबदला देखील देण्याची मागणी १६३ शेतकऱ्यांनी केली. 

१ जूनच्या बैठकीसाठी आमंत्रित नसल्याने शेतकरी नाराज 

सरकारने जमिनीचा रोख मोबदला द्यावा; तसेच कुंभमेळ्याच्या नियोजनाच्या प्रत्येक बैठकीत शेतकऱ्यांना सहभागी करून घ्यावं, अशी भूमिका शेतकऱ्यांनी घेतली आहे. येत्या १ जूनला मुख्यमंत्र्यांच्या उपस्थितीत नाशिकमध्ये आगामी सिंहस्थ कुंभमेळ्याच्या नियोजनाची बैठक होणार असून या बैठकीला शेतकऱ्यांना आमंत्रित न केल्याने शेतकऱ्यांमध्ये नाराजीचे वातावरण आहे.