Nashik Maharashtra Assembly Election : विधानसभा निवडणुकीच्या प्रचारासाठी शेवटचे काही तास शिल्लक आहेत. आज संध्याकाळी सहा वाजल्यानंतर प्रचाराच्या थोफा थंडावतील. त्यानंतर छुपा प्रचार सुरु होईल, त्यावर आयोगाची करडी नजर असेल. प्रचाराच्या शेवटच्या टप्प्यात नाशिकमध्ये मोठी घडामोड घडली आहे. नाशिकमधील एका नामांकित हॉटेलमध्ये आयोगाच्या अधिकाऱ्यांनी छापा मारलाय. यामध्ये तब्बल पाच कोटींचं घबाड जप्त करण्यात आलेय. त्याशिवाय नेत्यासह गाडीही पोलिसांनी ताब्यात घेतली आहे.

मिळालेल्या माहितीनुसार, नाशिकमधील रेडिसन ब्लू हॉटेलमध्ये आज छापा मारण्यात आला. त्यामध्ये पाच कोटी रुपये जप्त करण्यात आले. त्याशिवाय राजकीय नेत्यासह गाडीही पोलिसांनी ताब्यात घेतली आहे. पोलिसांकडून या घटनेचा तपास अद्याप सुरु आहे. ताब्यात घेण्यात आलेल्या व्यक्तीची कसून चौकशी करण्यात येत आहे. इतकी मोठी रक्कम कुठून आणि का आणली? हे पैसे कुणी दिले? कशासाठी दिले? यासारख्या प्रश्नांची पोलिसांकडून सरबत्ती कऱण्यात येत असल्याची माहिती समोर आली आहे. पोलिसांनी ताब्यात घेतलेला नेता कोणत्या राजकीय पक्षाशी निगडित आहे, याची चौकशी करण्यात येत आहे.

औरंगाबादमध्ये मोठी कारवाई -

निवडणुकीत वाटप करण्यासाठी आलेल्या अवैध आणि बनावट दारूवर छत्रपती संभाजीनगरच्या राज्य उत्पादन शुद्ध विभागाने कारवाई केलीये. शहराबाहेरील सुदंरवाडी परिसरात छापा मारुन ढाबा मालक आणि अवैद्यरित्या मद्य पिण्यास बसलेल्या लोकांवर दारु बंदी कायद्याअंतर्गत गुन्हा नोंद करुन त्यांना अटक करण्यात आली आहे. त्यासोबत एन-७ आंबेडकर नगर येथील एकाच्या घरात अवैधरित्या बिअर व देशी, विदेशी मद्याचा साठा साठवणुक केल्याची माहिती मिळाल्यानंतर छापा टाकून कारवाई करण्यात आलीय. जवळपास १ लाखाची ही दारू आहे.