Nashik News: अजित पवारांच्या भाजप प्रवेशांच्या चर्चांनी राज्याचे राजकारण तापलेले असतानाच नाशिकमध्ये (Nashik) मनसेला मोठा धक्का बसला आहे. मनसेचे शहराध्यक्ष दिलीप दातीर यांनी शहराध्यक्ष पदाचा राजीनामा दिला असून आपल्याला पद मुक्त करावे अशी विनंती करणारे पत्र मनसे अध्यक्ष राज ठाकरे यांना पाठवले आहे. (Latest Marathi News)

याबाबत अधिक माहिती अशी की, महाराष्ट्र नवनिर्माण सेनेचे (MNS) नाशिक शहर अध्यक्ष दिलीप दातीर (Dilip Datir) यांनी शहराध्यक्ष पदाचा राजीनामा दिला आहे. या संबंधीचे पत्र त्यांनी मनसे अध्यक्ष राज ठाकरे यांना पाठवले आहे. पदाला न्याय देता येत नसल्याने हा राजीनामा देत असल्याची प्रतिक्रिया त्यांनी दिली आहे.

नाशिक हा मनसेचा बालेकिल्ला म्हणून ओळखला जातो. महाराष्ट्र नवनिर्माण सेनेने नाशिक महापालिकेमध्ये 2012 मध्ये सत्ता मिळवली होती. त्यानंतर पक्षाची अवस्था बिकट असली तरी गटबाजी मात्र थांबलेली नाही. आता थेट शहराध्यक्षांनी राजीनामा दिल्याने हा मनसेसाठी मोठा धक्का मानला जात आहे.

दिलीप दातीर हे शिवसेनेचे (Shivsena) नगरसेवक असताना त्यांनी राजीनामा देऊन मनसेत प्रवेश केला होता. २०१९ मध्ये मनसेच्या माध्यमातून पश्चिम नाशिक विधानसभा मतदारसंघातून निवडणूक लढवली होती त्यात त्यांचा पराभव झाला होता. दरम्यान त्यानंतर त्यांना राज ठाकरे (Raj Thackeray) यांनी शहराध्यक्षपदी नियुक्त केले होते.