अजय सोनवणे, साम टीव्ही

सध्या राज्यात मुसळधार पावसाला सुरुवात झाली असून अनेक ठिकाणी जीवितहानीच्या घटना घडत आहे. नाशिक जिल्ह्यात दोन वेगवेगळ्या दुर्घटनांनी नागरिकांमध्ये भीतीचे वातावरण निर्माण झाले आहे. मालेगावमध्ये घराचा स्लॅब कोसळून आजी आणि नातवाचा दुर्दैवी मृत्यू झाला, तर निफाड तालुक्यात शाळेवर झाड कोसळण्याची घटना घडली. मालेगाव शहरातील कलेक्टर पट्टा परिसरात महारुद्र हनुमान मंदिराजवळ ही दुर्दैवी घटना घडली. सतत सुरू असलेल्या जोरदार पावसामुळे घराचा स्लॅब अचानक कोसळला. या दुर्घटनेत विमलबाई पंढरीनाथ येवले (वय 80) आणि चेतन रामचंद्र येवले (वय20) यांचा जागीच मृत्यू झाला.

घटना दुपारी सुमारे 3 वाजेच्या सुमारास घडली. घरात एकूण पाच जण राहत होते. घटनेची महाइति मिळताच अग्निशमन दल, स्थानिक प्रशासन आणि परिसरातील नागरिकांना तातडीने मदतकार्य सुरू केले. ढिगाऱ्याखाली अडकलेल्या इतर कुटुंबीयांना सुरक्षित बाहेर काढण्यात यश आले. मात्र आजी आणि नातवाला वाचवता आले नाही. या घटनेमुळे परिसरात हळहळ व्यक्त केली जात आहे.

दरम्यान, नाशिकच्या निफाड तालुक्यातील लासलगावजवळ ब्राह्मणगाव (विंचूर) येथे आणखी एक धक्कादायक घटना घडली. जिल्हा परिषद मराठी शाळेवर वादळी वाऱ्यामुळे मोठे लिंबाचे झाड कोसळले. झाड दोन भागांत तुटून त्यातील एक भाग थेट शाळेच्या इमारतीवर पडला, ज्यामुळे छतावरील पत्र्यांचे नुकसान झाले.

झाड कोसळताना झालेल्या मोठ्या आवाजामुळे शाळेतील शिक्षक आणि 31 विद्यार्थी घाबरून तातडीने वर्गाबाहेर धावले. सुदैवाने या घटनेत कोणतीही जीवितहानी किंवा दुखापत झाली नाही, त्यामुळे मोठा अनर्थ टळला. मात्र, झाडाचा उर्वरित भाग अजूनही धोकादायक अवस्थेत उभा असून तो तातडीने हटविण्याची गरज आहे. अन्यथा भविष्यात मोठी दुर्घटना घडण्याची शक्यता नाकारता येत नाही, अशी माहिती शाळेचे मुख्याध्यापक दिलीप फापाळे यांनी दिली.