नाशिकच्या वडणेर दुमाला गावात रक्षाबंधनाच्या दिवशी हृदय पिळवटून टाकणारी घटना घडली. बिबट्याच्या हल्ल्यात एका ३ वर्षीय चिमुकल्याचा मृत्यू झाला आहे. मात्र, या दुःखद प्रसंगात त्याची नऊ वर्षांची बहिण साश्रूनयनांनी भावाच्या थंड हातावर राखी बांधून निरोप देताना दिसली. हे हृदयद्रावक दृश्य पाहून संपूर्ण गाव शोकसागरात बुडाला.

ही घटना शुक्रवारी रात्रीच्या सुमारास घडली. आयुष भगत (वय वर्ष ३) असे मृत चिमुकल्याचे नाव आहे. ३ वर्षीय चिमुकला रात्रीच्या सुमारास घराबाहेर खेळत होता. अचानक दबा धरून बसलेल्या बिबट्यानं झडप घातली. नंतर त्याला उचलून नेलं. काही वेळानंतर त्याचा मृतदेह सापडला. आज रक्षाबंधन. चिमुकल्याला देखील ९ वर्षांची बहीण आहे.

बहिणीला भावाच्या मनगटावर राखी बांधून सण साजरा करायचा होता. दरम्यान, अंत्यसंस्कारापूर्वीच तिने भावाच्या थंड हातावर राखी बांधली आणि अश्रूंनी निरोप दिला. या क्षणी उपस्थित प्रत्येकाच्या डोळ्यात पाणी तर आलंच, तसेच गावभर हळहळ व्यक्त झाली. बहिणीचं हे रक्षाबंधन आयुष्यभरासाठी वेदनेचं गाठोडं बनलं आहे.

बिबट्यानं चिमुकल्यावर केलेल्या हल्ल्यामुळे गावात भीतीचे सावट पसरलं आहे. वनविभागाने बिबट्याचा शोध सुरू केला आहे आणि नागरिकांना सतर्क राहण्याचं आवाहन केलं आहे. दरम्यान, या घटनेनंतर भगत कुटुंबावर दुखा:चा डोंगर कोसळला असून, गावात बिबट्याच्या वावरामुळे भीतीचे वातावरण निर्माण झाले आहे.