तबरेज शेख 
नाशिक : म्हसरूळ पोलीस ठाण्याच्या हद्दीतील चामर लेणीच्या पायथ्याशी एका अज्ञात ट्रक चालकाचा मृतदेह आढळून आला होता. मात्र घातपात असल्याचा संशय पोलिसांना होता. शिवाय ट्रक चालकाची ओळख पटविण्याचे आव्हान देखील नाशिक पोलिसांसमोर होते. तपासादरम्यान सदर ट्रक चालकाची हत्या लुटमारीच्या उद्देशाने करण्यात आल्याचे उघडकीस आले. या प्रकरणी पोलिसांनी चार जणांना ताब्यात घेतले आहे. 

नाशिकच्या चामर लेणीच्या पायथ्याशी २२ जूनला अज्ञात व्यक्तीचा अर्धनग्न अवस्थेत मृतदेह सापडला होता. या मृतदेहाच्या शरीरावर जखमा आढळून आल्याने घातपात झाल्याचा संशय पोलिसांना होता. तसेच ट्रक चालकाची ओळख पटविण्याचे आव्हान देखील पोलिसांसमोर होते. दरम्यान खून करणाऱ्या संशयतांचा पोलिसांनी शोध घेतला असता मृत उमेश नागप्पा अंबिगर (रा. मरकुंडागाव, कर्नाटक) असे नाव असल्याचे समोर आले होते.  

पैशांची मागणी करत बेदम मारहाण 

दरम्यान संशयितांनी लुटमारीच्या उद्देशाने ट्रक चालकाचा खून केल्याचे समोर आले आहे. सिगरेट पेटवण्याच्या बहाण्याने चालकास उठवून त्याच्याकडे पैशाची मागणी केली. मात्र त्याने पैसे देण्यास नकार दिल्याने त्याला मारहाण केली. तसेच त्याच्याकडून दोन एटीएम कार्ड काढून घेऊन जीवे ठार मारण्याच्या धमकी देऊन पिनकोड घेत त्याला मारहाण केली. सदरचा पिनकोड चुकीचा असल्याचे लक्षात आल्यानंतर चौघांनी पुन्हा ट्रक चालकास बेदम मारहाण केली. यात त्याचा मृत्यू झाला असल्याची कबुली संशयितांनी दिली.

सीसीटीव्ही फुटेजच्या आधारे चारजण ताब्यात  

गुन्हे शोध पथकाच्या युनिट एकने सीसीटीव्हीच्या आधारे तसेच तांत्रिक विश्लेषणाद्वारे एक संशयास्पद मोटरसायकल निदर्शनास आली होती. हे संशयित म्हसरूळ परिसरात राहत असल्याची माहिती मिळाल्यानंतर पोलिसांनी सापळा रचत संशयित विजय खराटे, संतोष गुंबाडे, अविनाश कापसे, रवी शेवरे या चार संशयितांना पोलिसांनी ताब्यात घेतले. त्यांची कसून चौकशी केली असता त्यांनी खुनाची कबुली दिली आहे.