नाशिक : शेअर मार्केटमध्ये गुंतवणूक करण्याची सवय लागली असल्याने नुकसान होत असताना देखील यात पैसे गुंतवणूक करण्याचे थांबविले नाही. यात शेअर मार्केटमधील फॉरेक्स आणि ट्रेडिंगमध्ये तोटा झाल्याने पैशांची चणचण भासू लागली होती. यामुळे पैसे मिळविण्याच्या उद्देशाने चोरीचा मार्ग निवडत घरात घुसून चोरी करण्यास सुरवात केली. दोघा मित्रांचा यात सहभाग असून पोलिसांनी या दोघांनाही ताब्यात घेतले आहे. 

नाशिक शहरात घडलेल्या या प्रकारात पोलिसांनी उपनगर परिसरातून दोघे संशयितांना ताब्यात घेतले आहे. प्रथमेश उशीर आणि जोएल म्हस्के अशी ताब्यात घेतलेल्या दोघा संशयितांची नावे आहेत. प्रथमेश व जोएल याना शेअर मार्केटमध्ये पैसे गुंतवणुकीची सवय लागली होती. यातून झालेले नुकसान भरून काढण्यासाठी दोघे तरुण चोर बनले होते. दरम्यान नाशिक शहरातील अनेक भागात चोरीच्या घटना समोर आल्या होत्या. 

घरात घुसून पोत लांबविली 
याच दरम्यान काही दिवसांपूर्वी नाशिकच्या रामवाडी परिसरात महिलेचा पाठलाग करत महिलेच्या घरात घुसून गळ्यातील ३ तोळ्यांची पोत चोरट्यांनी लुटून नेली होती. हि धक्कादायक घटना उघडकीस आली असता पोलिसात तक्रार दाखल करण्यात आली होती. या प्रकरणाचा पोलिसांकडून तपास सुरु असताना दोघे चोरटे नाशिक उपनगर परिसरात असल्याची माहिती मिळाली होती. 

दोन लाखाचा मुद्देमाल हस्तगत 
मिळालेल्या माहितीनुसार पोलिसांच्या गुन्हे शाखा १ च्या पथकाने उपनगर परिसरात सापळा रचून दोघा चोरांना अटक केली. तसेच त्यांच्याकडून गुन्ह्यात वापरलेली दुचाकी आणि चोरी केलेली सोन्याची पोत असा एकूण १ लाख ९० हजार रुपयांचा मुद्देमाल पोलिसांनी हस्तगत केला. यात दोघांनीही शेअर मार्केटमध्ये तोटा झाल्याने चोरी केल्याची कबुली दिली आहे. तर पोलिसांकडून आणखी तपास सुरु करण्यात आला आहे.