नाशिक : हॉटेलजवळ उभे असताना पाण्याची बाटली घेण्यासाठी गेलेल्या मैत्रिणीची येथे बसलेल्या भिकाऱ्याने छेड काढल्याचा संशय आल्याने कोणताही विचार न करता डोक्यात दगड टाकून हत्या केली. सदरची धक्कादायक घटना नाशिक शहरातील ठक्कर बाजार परिसरात घडली असून या घटनेने खळबळ उडाली आहे. मारेकरी हा विधी संघर्षित बालक असून त्याला पोलिसांनी ताब्यात घेतले आहे.  

नाशिक शहरातील ठक्कर बाजार जवळील एका हॉटेल समोर हि घटना घडली आहे. यात एक विधी संघर्षित बालक हा आपल्या मैत्रिणीसोबत ठक्कर बाजार जवळील एका हॉटेल जवळ उभा होता. त्यावेळी मैत्रीण पाण्याची बाटली आणण्यासाठी हॉटेलवर गेली. त्याच ठिकाणी एक भिकारी देखील बसलेला होता. दरम्यान या भिकाऱ्याने मुलीची छेड काढल्याचा संशय त्या विधी संघर्षित बालकाला आला. 

रागाच्या भरात डोक्यात टाकला दगड 

छेड काढल्याच्या संशयातून मुलाने रागाच्या भरात कोणताही विचार न करता भिकाऱ्याच्या डोक्यात दगड टाकला. या घटनेत अज्ञात भिकाऱ्याचा मृत्यू झाला असल्याची माहिती सरकारवाडा पोलीसांकडून देण्यात आली. दरम्यान घटनेतील मुख्य संशयित असलेल्या विधी संघर्षित बालकाला पोलिसांनी ताब्यात घेतले असून पुढील तपास सुरु आहे. 

कुत्रा भुंकल्याने केले भयानक कृत्य 

रस्त्याने जात असताना कुत्रा भुंकल्याचा राग येऊन कुत्र्याला बेदम मारले. इतकेच नाही तर दोरीच्या सहाय्याने दुचाकीला बांधून फरफटत नेल्याची घटना नाशिकमध्ये घडली आहे. नाशिकच्या श्रमिकनगरमधील प्रकाराचा व्हिडीओ व्हायरल झाला आहे. दरम्यान मारहाणीत कुत्र्याचा मृत्यू झाला असून प्राणीप्रेमींची सातपूर पोलिस ठाण्यात तक्रार दाखल करत गुन्हा दाखल करण्यात आला आहे.