अजय सोनावणे, मनमाड

Nashik Nifad Chandwad Murder Case News नाशिकच्या निफाड चांदवड येहे बेपत्ता असलेल्या एका तरुणाचा मागील महिन्यात मृतदेह आढळून आला होता. या मृतदेहाचं शवविच्छेदन करण्यात आलं. या अहवालातून तरुणाची हत्या करून झाल्याचे निष्पन्न झालं. त्यानंतर त्याला नदीत फेकण्यात आल्याचा प्राथमिक अंदाज वर्तवण्यात आला होता. दरम्यान चौकशी नंतर धक्कादायक बाब उघडकीस आली आहे. मृत तरुणाच्या पत्नीने तिचा भाऊ आणि प्रियकराच्या मदतीने कट रचून हत्या केल्याचे समोर आले. याप्रकरणी एकूण सात आरोपींना अटक करण्यात आली आहे.

मिळालेल्या माहितीनुसार, शदाब तांबोळी हा १८ फेब्रुवारी रोजी घरातले सामान आणण्यासाठी घराबाहेर पडला होता. मात्र, तो परत न आल्याने कुटुंबीयांनी त्याचा सर्वत्र शोध घेतला. नातेवाईक, मित्रमंडळी तसेच संभाव्य ठिकाणी शोध घेऊनही शादाब सापडला नाही.

अखेर निफाड पोलीस ठाण्यात त्याची बेपत्ता असल्याची तक्रार दाखल करण्यात आली होती. पोलिसांकडून तपास सुरू असतानाच २३ फेब्रुवारी रोजी चांदवड तालुक्यातील परसूल परिसरात नदीच्या पुलाखाली पाण्यात तरंगताना त्याचा मृतदेह आढळून आला. घटनास्थळी पोलिसांनी धाव घेत मृतदेह ताब्यात घेतला. पाहणीदरम्यान शदाबच्या तोंडावर, हातपायांवर आणि कंबरेला वजनदार दगडांनी बांधलेले आढळून आले.

दरम्यान याप्रकरणी पोलिसांनी सखोल तपास केल्यावर आढळून आले की, या खुनाची सूत्रधार त्याची पत्नीच आहे. प्रियकर आणि भावाच्या मदतीने मुस्कान तांबोळी हिने पतीची निर्घृण हत्या केल्याचे उघड झाले. मात्र तिने असे का केले याचे कारण अद्याप समोर आलेले नाही. याप्रकरणी पोलीस पुढील तपास करत आहेत.