अभिजीत सोनवणे, नाशिक

नाशिकच्या जयभवानीरोड परिसरामध्ये परप्रांतीय आणि मराठी वाद उफाळून आला आहे. गाडीला धक्का लागल्याच्या शुल्लक कारणावरून सुरू झालेला हा वाद मराठी विरूद्ध परप्रांतीय असा झाल्यानंतर मनसैनिकांनी या परप्रांतीय इसमाला चोप देत धडा शिकवला. याप्रकरणी नाशिकच्या उपनगर पोलिसात दोन्ही बाजूने तक्रार दाखल करण्यात आली आहे.

नाशिकच्या जय भवानी रोड परिसरामध्ये मराठी विरुद्ध परप्रांतीय हा वाद विकोपाला गेल्यानंतर या वादाचं रूपांतर हाणामारीत झाल्याची घटना घडली आहे. या परिसरामध्ये लासुरे नामक मराठी कुटुंब राहायला असून या कुटुंबाला या भागातील एका परप्रांतीय इसमाने गाडी शिकत असताना गाडीचा धक्का लागलेल्या वादावरून अपशब्द वापरल्याने हा वाद सुरू झाला. मराठी लोगो की औकात क्या? तुम मराठी लोक भंगार हो, अशी मुजोरी केल्याचा आरोप मराठी नागरिकांनी केला.

या कुटुंबाने परिसरातील मनसैनिकांना याबाबत माहिती दिल्यानंतर मनसैनिकांनी या परप्रांतीयाला मराठी माणसाला भिकारडा आणि भंगार का म्हणाला? असा जाब विचारला. यावेळी परप्रांतीयाने मनसैनिकांशी देखील अरेरावी केल्याने मनसैनिकांनी या परप्रांतीयाला चोप दिल्याने हा वाद चांगलाच चिघळला आहे.

या सगळ्या वादानंतर या परप्रांतीय कुटुंबीयांनी देखील आपली बाजू मांडली. केवळ गाडीचा धक्का लागला यावरून हा वाद झाला होता. आम्ही मराठी माणसाला कुठेही शिवीगाळ केली नाही किंवा अपशब्द वापरला नाही. हा गाडी लागल्यावरून झालेला व्यक्तिगत वाद आहे, अशा प्रकारचा खुलासा या कुटुंबीयांनी केला. आम्हाला हा वाद वाढवायचा नाही, आम्ही देखील याच भागात गेल्या अनेक वर्षांपासून राहत असून आम्ही येथील मतदार आणि नागरिक आहोत. त्यामुळे हा वाद मिटावा अशी आमची मागणी असल्याची प्रतिक्रिया त्यांनी दिली आहे.

दरम्यान या सगळ्या वादाप्रकरणी नाशिकच्या उपनगर पोलीस ठाण्यामध्ये लासुरे कुटुंबीयांनी तक्रार दाखल केली असून या परप्रांतीय कुटुंबीयांकडून देखील पोलिसांकडे तक्रार करण्यात आली आहे. त्यामुळे आता या मराठी विरुद्ध परप्रांतीय वादावर पोलीस ठाण्यातील तक्रारीनंतर पडदा पडतो की हा वाद अजून वाढतो? हे बघणं महत्त्वाचं असणार आहे.