Nashik Bus Accident News Update : नाशिकच्या येवला - नांदगाव रस्त्यावर भीषण अपघात झाल्याची बातमी समोर आली आहे. मध्य प्रदेशातून प्रवासी घेऊन जाणारी लक्झरी बस पलटल्याने हा अपघात झाला. या अपघातात एकाच जागीच मृत्यू झाला असून इतर प्रवासी जखमी असल्याची माहिती आहे. दरम्यान चालकाचे बसवरील नियंत्रण सुटल्याने बस पलटी झाल्याचे उघडकीस आले आहे. याप्रकरणी पोलीस पुढील तपास करत आहेत.

मिळालेल्या माहितीनुसार, अपघाताच्या वेळी बसमध्ये सुमारे २० ते २५ प्रवासी प्रवास करत होते. अपघाताची माहिती मिळताच स्थानिक नागरिक, पोलीस आणि आपत्कालीन यंत्रणा घटनास्थळी दाखल झाल्या. जखमींना तत्काळ नांदगाव ग्रामीण रुग्णालयात दाखल करण्यात आले असून त्यांच्यावर उपचार सुरू आहेत. बस पलटल्यामुळे येवला-नांदगाव मार्गावरील वाहतूक काही काळ विस्कळीत झाली होती. प्राथमिक तपासात चालकाचे वाहनावरील नियंत्रण सुटल्याने हा अपघात घडल्याची शक्यता व्यक्त करण्यात येत आहे.

नागपूरमध्ये भीषण अपघात ( Nagpur Car Accident Update News )

नागपूर जिल्ह्यातील सावनेर येथे राष्ट्रीय महामार्गावरील दहेगाव-रंगारी परिसरातही रात्री उशिरा कश्मिरा लॉनसमोर तीन चारचाकी वाहनाचा भीषण अपघात झाला. या अपघातात आय-२० कार चालकाचा जागीच मृत्यू झाला, तर दोन महिला गंभीर जखमी झाल्या आहेत.

पोलिसांनी दिलेल्या माहितीनुसार, स्विफ्ट डिझायर कार यूटर्न घेत असताना मागून भरधाव वेगाने आलेल्या अज्ञात चारचाकी वाहनाने तिला जोरदार धडक दिली. धडकेची तीव्रता इतकी होती की स्विफ्ट डिझायर समोरून येणाऱ्या आय-२० कारवर आदळली. त्यानंतर आय-२० कार चालकाचे नियंत्रण सुटून कार ३ वेळा पलटी झाली. अपघातानंतर धडक देणारे अज्ञात वाहन घटनास्थळावरून पसार झाले. या प्रकरणी पोलिसांनी गुन्हा नोंदवून फरार वाहनचालकाचा शोध सुरू केला आहे.