तळोदा (नंदुरबार) : पत्नी आजारी असल्याने पैशांची गरज आहे; असे सांगत सोन्याच्या दागिन्यांच्या बदल्यात रोख रक्कमेची मागणी केली. त्यानुसार बनावट सोन्याची माळ देऊन भाजी विक्रेत्याची पाच लाख २१ हजारांत फसवणूक झाल्याची घटना समोर आली आहे. याबाबत तळोदा पोलिसांत गुन्हा दाखल झाला. 

तळोदा (Taloda) येथील अशोक गवळे व त्यांची पत्नी सुरेखाबाई हे भाजीपाला विक्री करून उदरनिर्वाह करतात. याच दरम्यान त्यांची दोन व्यक्तींशी ओळख झाली. या ओळखीतून त्यांनी २१ ऑगस्टला गवळे यांच्या दुकानावर येत पत्नीची तब्येत बिघडली असून, उपचारासाठी पाच लाख मागितले. बदल्यात पाच लाखांपेक्षा जास्त किमतीचे सोन्याचे दागिने देण्याचे सांगितले. त्यासाठी धुळ्याच्या दवाखान्यात यावे लागेल, असे सांगून गवळे यांना सोन्याचे मणी देऊन २६ ऑगस्टला २१ हजारांची रोकड घेतली. 

या नंतर गवळे यांना ३० ऑगस्टला सरकारी दवाखाना हिरे वैद्यकीय महाविद्यालयात बोलावले. तेथे गवळे यांच्याकडून पाच लाख रुपये घेतले. दरम्यान, बनावट (Fraud) सोन्याच्या मणीच्या माळा देऊन आपली फसवणूक झाल्याचे गवळे यांच्या लक्षात आले. पोलिस उपनिरीक्षक महेश निकम तपास करीत आहे.