सागर निकवाडे 

नंदुरबार : नंदुरबारचे तहसीलदार नितीन गर्गे हे मनमानी पद्धतीने कारभार करत असल्याचा आरोप करत यांच्या विरोधात ठाकरे गट आक्रमक झाला आहे. तहसीलदार यांची तात्काळ बदली व्हावी; यासाठी ठाकरे गटाचे पदाधिकारी बेमुदत उपोषणाला बसले आहेत. याबाबत निवेदन देखील देण्यात येणार आहे. 

नंदुरबारच्या (Nandurbar) तहसीलदार नितीन गर्गे हे मनमानी पद्धतीने कारभार करत असतात. त्यांच्यामुळे तहसील कार्यालयातून मिळणारे अनेक दाखले महिन्यापासून प्रतीक्षेत आहेत. तर अनेक योजना देखील लाभार्थ्यांना मिळत नाही. तहसीलदार गर्गे हे वेळेवर उपलब्ध राहत नसल्याने कुठल्याच दाखल्यांवर स्वाक्षरी होत नाही आहे. यामुळे लाभार्थीना हे दाखले वेळेत मिळू शकत नसल्याचा आरोप (Shivsena) शिवसेना ठाकरे गटाच्यावतीने करण्यात आला आहे. या कारणाने आक्रमक भूमिका घेत आंदोलन छेडले आहे.  

या मनमानी कारभारामुळे तहसीलदाराची तात्काळ बदली करण्यात यावी; या मागणीसाठी ठाकरे गटाचे पदाधिकारी आजपासून बेमुदत उपोषणाला बसले आहेत. तसेच जोपर्यंत तहसीलदाराची बदली होत नाही, तोपर्यंत उपोषणातून माघार घेणार नसल्याची भूमिका ठाकरे गटाचे पदाधिकाऱ्यांनी घेतली आहे.