सागर निकवाडे 
नंदुरबार : गर्भवती महिलेला रुग्णालयात नेण्यासाठी झोळीत टाकून नेण्यात येत होते. याबाबत साम टीव्हीने बातमी दिल्यानंतर बांधकाम विभागाला खडबडून जाग आली असून कर्मचारी घटनास्थळी येत पाहणी केली. यानंतर शहादा तालुक्यातील बुरीमाळ, साबलापाणी, उमरापाणी दुर्गम भागात लवकरच दोन लहान आणि दोन मोठे पूल आणि सहा किलोमीटर पर्यंतचा रस्ता तयार केला जाणार आहे.

नंदुरबारच्या शहादा तालुक्यातील नागझिरी ग्रामपंचायत अंतर्गत येणाऱ्या बुरीनमाळपाडा येथील एका गर्भवती महिलेला प्राथमिक आरोग्य केंद्र राणीपुर येथे नेण्यासाठी तब्बल ७ किलोमीटरचे अंतर झोळी करून आणि पायपीट करत पार करावे लागले. रस्ता नसल्यामुळे आणि कोणतीही वाहन व्यवस्था उपलब्ध नसल्याने ही गंभीर परिस्थिती साम टीव्ही प्रसारित केल्यानंतर बांधकाम विभाग आता खडबडून जागा झाला असून साम टीव्हीच्या बातमीची दखल घेण्यात आली आहे.

चार पुलांसह रस्ता होणार तयार 

दरम्यान नागझिरी ग्रामपंचायत अंतर्गत बुरीमाळ, साबलापाणी, उमरापाणी या गावात आता रस्ता आणि पूल तयार करण्यात येणार आहे. या परिसरामध्ये नदीवर दोन मोठे पूल आणि दोन लहान पूल तयार केले जाणार आहेत. त्यासोबतच सहा किलोमीटर पर्यंतचा रस्ता बांधकाम विभागाच्या माध्यमातून तयार केला जाणार असल्याचे सांगण्यात आले. 

जागेचे करण्यात आले मोजमाप 

शहादा सार्वजनिक बांधकाम विभागाच्या अधिकाऱ्यांनी घटनास्थळी जाऊन रस्ता आणि फुल तयार करण्याची जागेचे मोजमाप करण्यात आलेले आहे. लवकरच या भागात रस्ते आणि पूल तयार होणार आहेत. यामुळे इथल्या आरोग्याच्या समस्या आणि दळणवळणाच्या समस्या सुटणार असून साम टीव्हीने दाखवलेले या बातमीनंतर स्थानिक आदिवासी बांधवांकडून साम टीव्हीचे आभार मानण्यात आले आहे.