नर्मदा नदीत अंघोळीसाठी गेलेल्या तरुणावर मगरीने अचानक हल्ला चढवला. या हल्ल्यात तरुणाच्या पायाला गंभीर दुखापत झाली असून, त्याला जिल्हा रुग्णालयात उपचारासाठी दाखल करण्यात आले आहे. हा तरूण नंदूरबारच्या अक्राणी तालुक्यातील भरड गावातील रहिवासी असल्याची माहिती आहे. या घटनेनंतर स्थानिक प्रशासनाकडून नदीपात्राजवळ सावधगिरी बाळगण्याचे आवाहन करण्यात आले आहे.

कमलेश पावरा असे गंभीर जखमी असलेल्या व्यक्तीचे नाव आहे. तो अक्राणी तालुक्यातील भरड गावातील रहिवासी असल्याची माहिती आहे. कमलेश नेहमीप्रमाणे नर्मदा नदीत आंघोळ करण्यासाठी गेला होता. पावसामुळे नदी पात्रात वाढ झाली होती. त्यामुळे नदीत मगरींचा वावर वाढला होता. नदीत पोहत असताना त्याच्याजवळ अचानक मगर आली.

मगरीने तरूणावर प्राणघातक हल्ला केला. त्याने कसंबसं स्वत:चा जीव वाचवण्याचा प्रयत्न केला. तो नदी काठावर आला त्यानंतर स्थानिकांनी धाव घेत त्याला तातडीने जिल्हा रूग्णालयात नेले. मगरीने केलेल्या हल्ल्यात त्याच्या पायाला गंभीर दुखापत झाली आहे. मगरीने तरूणाच्या पायाचा लचकाच तोडला आहे. सध्या त्याच्यावर उपचार सुरू आहेत.

सध्या पावसाळा सुरू आहे. संततधार पावसामुळे नर्मदा नदीपात्रातही वाढ झाली आहे. पाण्याच्या पातळीत वाढ झाल्यामुळे मगरींचा वावरही वाढला आहे. दरम्यान, यामुळे अशा घटनांची अधिक शक्यता वाढली आहे. काही महिन्यांपूर्वीही याच परिसरात मगरीच्या हल्ल्यात एक वृद्ध व्यक्ती गंभीर जखमी झाला होता. या घटनेनंतर स्थानिक प्रशासनाकडून नदीपात्राजवळ सावधगिरी बाळगण्याचे आवाहन करण्यात आले आहे.