सागर निकवाडे 
नंदुरबार : राज्य सरकारने सुरु केलेल्या लाडकी बहीण योजनेत पात्र महिलांना दर महिन्याला १५०० रुपये बँक खात्यात टाकले जात आहेत. या महिन्यात देखील योजनेचे पैसे येऊन पडले आहेत. मात्र बँकेतून हे पैसे काढण्यासाठी लाडक्या बहिणींना बँकेच्या बाहेर तासनतास बसून रहावे लागत आहे. मागील तीन दिवसांपासून हि समस्या शहादा येथील सेंट्रल बँकेत पाहण्यास मिळत आहे. 

नंदुरबारच्या शहादा तालुक्यातील विविध भागात झालेल्या जोरदार पावसामुळे इंटरनेट सेवेवर याचा परिणाम झाला आहे. त्यामुळे ब्राह्मणपुरी येथील सेंट्रल बँकेचा सर्वर गेल्या तीन दिवसांपासून बंद आहे. परिणामी आर्थिक व्यवहाराला ब्रेक लागलेला आहे. त्यामुळे लाडकी बहीण योजनेचे पैसे काढण्यासाठी लाडक्या बहिणींना तासन्तास बँकेबाहेर बसण्याची वेळ आली आहे. खात्यात येऊन पडलेले पैसे हातात कधी पडतील? याची प्रतीक्षा आहे. 

लाखो रुपयांचे व्यवहार रखडले 

शहादा तालुक्यात गेल्या आठवड्याभरापासून ठीकठिकाणी वादळी वाऱ्यामुळे विजेचे खांब पडले आहेत. परिणामी इंटरनेट सेवा देखील विस्कळीत झाली आहे. इंटरनेट सेवेचा परिणाम बँकांच्या व्यवहारावरही होताना दिसत आहेत. अनेक वेळा सेवा खंडित झाल्यामुळे, तर कधी सर्वर डाऊन असल्यामुळे बँकांचा व्यवहार ठप्प झालेला आहे. सध्या बँकेतून पैसे काढणे पासबुक भरून घेणं शक्य होत नसल्याने अडचणी वाढल्या आहेत. सर्व डाऊनच्या फटक्यामुळे लाखो रुपयांचे व्यवहार रखडले आहेत. 

शेतकरीही अडचणीत व्यावसायिक

शेतकरी, लाडक्या बहिणी त्यासोबतच विद्यार्थ्यांना देखील याचा सामना करावा लागत आहे. सातत्याने होणारा इंटरनेट खंडित आणि बँकेचे सर्वर डाऊनचा फटका लाडकी बहिणी सोबतच शेतकऱ्यांना देखील बसतांना पाहायला मिळत आहे. परिणामी खत घेण्यासाठी देखील पैसे बँकेतून निघत नसल्याने शेतकरी देखील अडचणीत आहे.