सागर निकवाडे 

नंदुरबार : नंदुरबार जिल्ह्यात गेल्या तीन दिवसांपासून मुसळधार पाऊस सुरु आहे. या पावसाने जिल्ह्यात हाहाकार माजविला असून पावसामुळे नदी, नाल्यांना मोठे पूर आले आहेत. दरम्यान पावसामुले आलेल्या पुराच्या पाण्यात तब्बल तीन जण वाहून गेल्याची घटना जिल्ह्यात घडली आहे. यात एका आश्रम शाळेतील शिक्षकाचा समावेश आहे. 

नंदुरबार जिल्ह्यात तीन- चार दिवसांपासून जोरदार पाऊस होत आहे. यामुळे आलेल्या पुराने मोठ्या प्रमाणात नुकसान देखील केले आहे. (Nandurbar Rain) जिल्ह्यातील ४२ घरांची पडझड झाली आहे. दरम्यान अक्कलकुवा तालुक्यात दोन तर अक्राणी तालुक्यात एक जण पुराच्या पाण्यात वाहून गेल्याची घटना समोर आली आहे. यात अक्राणी तालुक्यातील माळचा गेंदा येथील बायसिंग बहादुर पावरा (वय ३६) हे पुरात वाहुन मृत झाले आहेत. तर (Akkalkuwa) अक्कलकुवा तालुक्यातील गुलींअंबरचे रहिवाशी असलेले संतोष रमेश वसावे हे पुराच्या पाण्यात वाहून गेले आहेत. 

दुचाकीसह शिक्षक गेले वाहून 

तसेच अक्कलकुवा तालुक्यातीलच दुर्गम भागातील बर्डी येथील शासकीय आश्रम शाळेत रोजंदारी शिक्षक असलेले ईश्वर रामा वसावे (रा. गमन) हे रोयाबारीपाडा येथील दुकानावरून घरी परत जात होते. रस्त्यातील नदी ओलांडत असताना ते वाहून गेल्याची घटना रविवारी सायंकाळी साडेपाचच्या सुमारास घडली होती. त्यांच्या मृतदेह आज सकाळी दहा वाजेच्या सुमारास आढळून आला.