सागर निकवाडे 

नंदुरबार : गेल्या आठवड्याभरात नवापूर तालुक्यात अतिवृष्टी झाली होती. दमदार पावसामुळे सर्वत्र पूरजन्य परिस्थिती निर्माण झाली होती. यामुळे तालुक्यातील नदी, नाले प्रवाहित झाले असून तालुक्यात असलेले लहान मोठे धरण आणि बंधारे देखील ओव्हर फ्लो झाले आहेत.  त्यामुळे ग्रामीण भागातील नागरिकांची पाण्याची समस्या आता मिटली आहे. 

नंदुरबार (Nandurbar) जिल्ह्यात अजूनपर्यंत अपेक्षित असा दमदार पाऊस झालेला नाही. यामुळे जिल्ह्यातील अनेक धरणातील पाणीसाठा कमीच आहे. मात्र गेल्या आठवड्यात नवापूर शहरासह तालुक्यात अतिवृष्टी (Heavy Rain) झाली होती. यामुळे प्रचंड नुकसान झाले आहे. तर अनेक भागात पूरजन्य परिस्थिती देखील निर्माण झाली होती. अनेकांच्या घरात पाणी शिरले होते. यामुळे नुकसान झाले. मात्र दुसरीकडे नाले, बंधारे व नदीला देखील पूर आल्याने पाण्याचा प्रश्न मिटला आहे. बंधारे व धरण ओव्हरफ्लो होऊन वाहत आहेत. 

रंगवली धरण १०० टक्के भरले 

नवापूर (Navapur) तालुक्यात झालेल्या अतिवृष्टीमुळे नवापूर शहराला पाणी पुरवठा करणारे रंगावली धरण शंभर टक्के भरले आहे. यामुळे नवापूर शहराचा पाण्याचा प्रश्न मिटला आहे. असे असले तरी नंदुरबार जिल्ह्यातील अनेक भाग अद्याप कोरडा असल्याने जिल्ह्यात दमदार पावसाची अपेक्षा आहे. जिल्ह्यात दमदार पाऊस झाल्यानंतर सर्व धरण व बंधारे पाण्याने फुल्ल भरतील.